2 gerîlayê HPGyî Atîlla Çîçek û Huseyîn Yildirim hetê hukmatê Armenîstanî ra teslîmê Tirkîya ameybî kerdene. Wekîlê Parlamentoyê Armenîstanî Gegham Manukyan keyepelê 168.amî û rîpelê xo yê facebookî de fotografê wird gerîlayan weşanayî û bin de wina nuşt: ''2 şorigêrê şerê azadîye yê şarê kurdî yê ke seba azadîya şarê xo şer kerdêne, vera zulmê tirkan şer kerdêne.''

Manukyanî vist vîrî ke wird gerîlayan zî Dêrsim de têkoşîn kerdêne û vat: ''Wextê Qirkerdişê Armenîyan de xeylêk hemwelatîyê ma xêrê kurdan ra xelisîyayî, dima zî tewrê serewedaritişê Dêrsimî bîyî. La nika kurdî yenê remnayene û teslîmê dewleta tirke yenê kerdene ke Azerbaycan bi sponsorîya dewleta tirke 44 rojî yo hêrişê erdê ma keno.''

Manukyanî vist vîrî ke mehkeme derheqê wird gerîlayan de bira veradayîşî dabî. Manukyanî vat: ''Seba ke ma domanê şima teslîmê tirkan kerdî ke îşkenceyê domanan bikerê, ma bexş bikerê way û birayanê ma. Nika hukmatêkê ma çin o. No hukmat xora dişmen û îşxalkerê welatê ma yo. Armenîstanî 30 serrî yo xîyanetêko winasên nêdîbi. Mîyanê nê serran de serebûtêko winasên çin bi. Serekwezîr Nîkol Paşînyanî xora her çi teslîmê tirkan kerdo.''

Manukyanî qesawetê xo ard ziwan û vat ke beno siba dore do bêra çêranê şerê Artsahî (Qerebaxî). Manukyanî bale ante ser ke 6ê teşrîna verêne de Erdogan û Paşînyan Prag de do pîya ronişê.

Manukyanî vat: ''Paşînyanî dîyarîyêke daye tirkan. Nika zî seba teslîmkerdişê welatî pêvînayîşî do bikero. Nê xîyanetî ra way û birayê mi, ma efû bikerê. Ma zî do nê hukmatê îşxalkerî ra xo bixelisnê.

#bijî Kurdistana Azad !

#bijî Arménie Azad !

#bijî dostaniya Ermenî-Kurd!

#bibore birano!"