Rixmê raporanê serê herêmanê şerî yê Kurdîstanî zî Rêxistina Qedexekerdişê Çekanê Kîmyewîyan (OPCW) cigêrayîşê hewceyî nêkeno. Wekîlê Parlamentoyê Îngilîstanî Russel Moyleyî derheqê babete de ANFyî rê qisey kerd.

Moyleyo ke heman wextî de Endamê Koma Parlamentoyî ya Partîyanê Tirkîya û Sûrîye yo  derheqê hêrişanê kîmyewîyan de raporê sûcî vistî rojdemê parlamentoyî.

Moyleyî ard ziwan ke parlamento de sûcê şerî yê dewleta tirke nêameyî ercnayene û vat: ''Parlamento zêdeyêr şerê Ukrayna-Rûsya ser o vindeno. Tirkîya derheqê NATOyî de meseleya Swêd û Fînlandîya de vera qanûnanê mîyanneteweyîyan tawîzanê hîrana wazena ke vera şarê kurdî bişuxilna. Parlamentoyê Îngilîstanî nê çaxan babetanê serê Tirkîya nimnena. La têna ez nê wekîlê bînî zî kenê ke sûcanê dewleta tirke bîyarê rojdemê parlamentoyî. 

Ganî qetî cigêrayîş bêro kerdene ke dewleta tirke herême de çeka kîmyewîya şuxilnaya yan nê. Labelê OPCW seba menfaatanê xo cigêrayîşî nêkeno. Derheqê babete de Başûrê Kurdîstanî ra zaf raporî yenê. Ganî na babete de şarê kurdî bêro goşdarîkerdene. Verî zî şarê kurdî reyde dîyalogî ameybî kerdene. Na rewşe şerê zereyî yo. Verî ma îsbat kerdbi ke Rojawan de Tirkîya paştî dana îslamîstan, çeka kîmyewîye şuxilnena û şarê kurdî qetil kena. Heyf ke reyna çekî roşîyenê Tirkîya. Swêdî qedexeyê rotişê çekan wedarit.''

Moyleyî îfade kerd ke ganî wina bêro kerdene ke Tirkîya dormeyê masaya dîyaslogan de ronişa. Moyleyî vat: ''Tirkîya hetê NATOyî ra pawîyena. La ganî NATO zî zor bido Tirkîya ke dormeyê masaya çareserîye de ronişa. Ma vînenê ke Tirkîya, Îran û Rûsya bîyê nêzdîyê yewbînan. Ma hêvî kenê ke Tirkîya do krîteranê NATOyî têbigêra. 

Parlamentoyê ma û Kamaraya Lordan derheqê çîyanê ke vera kurdan yenê kerdene de qerqilîyenê. Kurdî têna verdîyayî û înan ser o tehluke est o. Ma hetê şarê Kurdîstanî de yê û paştî danê înan. Ganî ma derheqê hêrişanê kîmyewîyan de delîlan pêser bikerê û pêşkêşê selahîyetdaran bikerê. Ma zanenê ke kurdî wextêkê zor û zehmetî de yê. Paştdayîşê ma kurdan reyde yo.''