5 tepişteyî Edîrne ra surgunê Gîresunî ameyî kerdene. Wextê surgunî de montî nêdîyayî tepişteyan û cigêrayîşo rût ame ferzkerdene. Ame parekerdene ke tepişteyan rê rîng de pê klîmaya serdine îşkence ame kerdene.
5 tepişteyî 8ê kanûne de Zîndanê Edîrne ra surgunê Zîndanê Gîresunî ameyî kerdene. Nînan ra Çekdar Ozerî 10ê kanûne de cinîya xo Sultane Yilmaz Ozer rê pê telefonî pare kerd ke wextê surgunkerdişî de ê maruzê îşkenceyî bîyê.
Sultane Yilmaz Ozer da zanayene ke a 8ê kanûne de şîya zîndanê Edîrne û uca de xebera ci pê surgunî bîya.
Sultane Ozer vat: ''Mêrdeyê mi 10ê kanûne de mi rê telefon kerd. Gardîyanan ê girewtî verî berdî Zîndanê Çorumî. Zîndanê Çorumî de ci rê cigêrayîşo rut ameyo ferzkerdene semedo ke înan no qebul nêkerdo maruzê şîdetê gardîyanan bîyê. Gardîyanan ê berdî odayêka ke dêsê ci de gonîye esta. Gardîyanan vato 'Na gonîye yê kesanê sey şima yê.' Roja bîne wexto ke ê Zîndanê Çorumî ra şîyî montê înan nêdîyayo. Wesayît de zî heta Gîresunî klîmaya serdine ameya akerdene. ''
Sultane Gezer ard ziwan ke a seba rewşa mêrdeyê xo qerqilyena û vat: ''Ma her roje zîndanan ra xeylêk xeberê îşkence û mergî gênê. Ez na xebera îşkenceyî ra dima zêdêr kewta qesawet. Ez do peyê na mesele de biba. Ê do hesabê nê îşkenceyî bidê.''
