Roja hîrêyîne de verê Şaredarîya Xelfetî ya Riha de nobeta vera destsernayîşî dewam kena. Şar serê sibayî ra nata verê şaredarîya ablûqakerde de kom bena. Wekîlê DEM Partî Dîlan Kûnt Ayan, Ayten Kordû, Ferît Şenyaşar, Mîthat Sancar, Omer Ocalan, Zulkuf Ûçar û Hemşaredarê Xalfetî Saniye Bayram û Mehmet Karayilan, Mayê Haştîye zî mîyanê girseyî de yê.

Nobete de deyîrî yenê vatene, sloganî yenê berzkerdene û astengîya vera dekewtişê şaredarîye yena şermezarkerdene. Cinîyêka astengdare çalakîye de vat: ''Ma hetê şaredaranê xo de yê.''

Heyetê wekîlan esnafî zî zîyaret kerdî û venga şarî da ke wa tewrê xoverdayîşî bibo.

Wina pawîyeno ke ewro Hemserekê DEM Partî Tuncer Bakirhan û Tulaye Hatîmogullari, Hemsereka DBPyî Çîgdeme Kiliçgun Uçar, Hemvervatoxê HDKyî Merale Daniş Beştaş, Hemserekê ÎHDyî Îbrahîm Kuçukbalaban, Hemserekê TÎPî Erkan Baş nobete zîyaret bikerê.