28. Xelatê Rojnamegerîye yê Musa Anterî yê Şehîdanê Çapemenîya Azade bi merasîmêkî Merkezê Kulturî yê Cemîl Candaşî de ameyî dayene.

Hemserekê HDPyî Mîthat Sancar, Wekîlê HDPyî Alî Kenanoglû, Mîsa Pîroglu, Wekîlê CHPyî Sezgîn Tanrikulu, Sereko Pêroyî yê EMEPî Ercument Denîz, Sereko Pêroyî yê DÎSK Basin-Îşî Faruk Eren, Mayê Şemeyî, temsîlkarê Kongreya Demokratîke ya Şaran (HDK)MATÛHAY-DER, ANYAKAY-DER, ÎHDyî, xeylêk temsîlkarê çapemenîye û rêxistinanê komelê sivîlî zî tewrê merasîmî bîyî.

Merasîmî pê deqayêkê rêzgirewtişî dest pêkerd, qiseykerdişî ra verî sînevîzyonêk ame mojnayene.

Wayîrê Îmtîyazî yê Yenî Yaşamî û Wekîlê HDPyî Ridvan Turanî qisey kerd û vat ke çapemenîya azade Musa Anterî ra heta nika bîye nameyê têkoşînê azadî, huqûq û edaletî. 

Hemserekê Mîthat Sancarî vat: ''Mesuldarîya ma ya ke ma mîrasê çapemenîya azade yê Musa Anter û ê bînan bipawê. Çapemenîya azade nika binê şertanê giranan de têkoşînê xo yê heqîqatî rê dewam kena. Ganî ma ver bi heqîqatî şorê û tira qetî fek vera nêdê. Ma pê rojnamegeran sereberz ê.''

Kênaya Musa Anterî Rahşane Anter zî bi vîdeoyêkî mesaj şawit û vat ke çapemenîya azade Ozgur Gundemî ra heta Yeni Yaşamî rayîrêko dûr û derg xo pey de verda. 

Şaredarê Îstanbulî Ekrem Îmamogluyî zî mesajêk şawit û wayîrê xelatî fîraz kerdî.

Qiseykerdişan ra dima hunermendê Merkezê Kulturî yê Mezopotamya vejîyayî sehne ser û konserî ra dima zî xelatî ameyî dayen.