Polîsanê tirkan xeylêk şaristananê Vakurê Kurdîstanî û Tirkîya de çarçewa qirkerdişê sîyasî de eşt xeylêk keyeyan ser û zaf kesî destbend kerdî. Polîsan wextê sereştişan de zî keyeyê merdiman serûbin kerdî.

Amed  

Amed de polîsan Azîz Yagmur, Mehmet Yalçin destbend kerdî. Polîsan berê Azîz Yagmurîşikna û 4 endamê keyeyî erdî ro derg kerdî. Polîsan pê înan heqaret kerd û dest na telefon û kitaban ser.

Şirnex  

Qezaya Hezexî ya Şirnexî de polîsan eşt keyeyê îdarekarê verênî yê HDPyî Husnu Babatî ser û o destbend kerd. Babat erşawîya Mudirîya Polîsan a Hezexî.

Wan

Polîsan vizêr şewe eşt bînaya Rêxistina HDPyî ya Wanî ser. Polîsan qatê 4. de Meclîsê Ciwanan de cigêrayîş kerd û dest na harddîsk û kitaban ser. Polîsan notê bi nuşteyê ''Selamun Aleykum ma ameyî'' verda. Hetê bînî ra serê sibayî polîsan eşt xeylêk keyeyan ser û Denîze Adar Eldemîr, Dîlaver Eldemîr, Ferhat Azan û Arjîne Tunçer destbend kerdî. Ferhat Eldemîr zî Xarpêt de ame destbendkerdene. 

Sêrt 

 Polîsan eşt keyeyê Endama Meclîsê Şaristanî Cemîle Altin ser û keye de gêrayî. Cemîle Altin ameye destbendkerdene û ameye berdene bi Mudirîya Polîsan a Sêrtî.

Êlih 

Êlih de derheqê 15 kesan de bira destbendkerdişî dîyaye û 14 kesî bi îdîaya Serebûtanê Kobanê ameyî destbendkerdene.

Mêdîn

Avûkanê Baroyê Mêrdînî ra Abdulkadîr Gunero ke seba ke çarçewa cipêrsayîşê ke derheqê ey de ameyo destpêkerdene îfade bido, şi Mudirîya Asayîşî ya Bajarî ûca ame destbendkerdene.

Îzmîr 

Îzmîr de operasyonanê qirkerdişê sîyasîyî de 9 cinîyî ameyî destbendkerdene. Endama HDPî Fadîme Kocakaya, Îdarekara TUHAY-DERî Hedîye Tekîn, Zerga Ozturk, Zuhale Çelebî, Mutebere Akgul, Saîme Akin zî tede 9 cinîyî ameyî berdene bi Asayîşê TEMî yê Çankaya.

Anqara 

 Sereştişanê keyeyan de Endamo verên ê Meclîsê HDPyî Erol Çîftçî, Endamê HDPyî Tunahan Guzlugol, endamê Meclîsê Ciwananê HDPyî Newroz Gulen, Mesut Çîftçî, Ezgî Orak û Mahmut Altan ameyî destbendkerdene.