Rêxistina HDPyî ya Dêsrimî derheqê hêrişê polîsan ê vera cenazaya Aysele Dogane de banê partîye de kombîyayîşê çapemenîye kerd. Endam û temsîlkarê partîyanê çep-sosyalîstan tewrê kombîyayîşî bîyî.

Wekîlê HDPyî yê Dêrsimî Alîcan Onluyî vat. ''Hêrişê vera şar û cenaza netîceya provokasyonê Wezîrê Karanê Zereyî yê Tirkî û Walîyê Tuncelî de ame kerdene.  Wezîrê Karanê zereyî ercê merdimîye binpay kerdî û hêrişê cenaza kerd. Senî ke Fîlîstîn de hêrişê vera cenazaya rojnemerî faşîzm o, hêrişê vera cenazaya Aysele Dogan zî faşîzm o. Seba ke ma xo vera TOMAyan pê kerran pawit derheqê mi û embazanê ma yê bînan de medyaya sanale de hêrişo sîstematîk yeno rayraberdene ke merasîmê cenaza bêro krîmînalîzekerdene. Kerraya ke mi eşte sembolê xoverdayîş û pawitişê şarî yê vera hêrişê giranî yê hêzanê serdestan a. Kerraya ke mi eşte zirar nêda yew kesî ya zî ganîyî. A kerra vera metod û hişmendîya faşîzmî û wesayîtî ameye eştene.''

Onluyî derheqê vatişanê Wezîrê Karanê Zereyî Suleyman Soylu yê ke derheqê ey de vatî de wina qisey kerd. ''Wezîrê Karanê Sûcî wa verî hesabê sûcanê xo bido. Heme kesê ke karanê leyminan, xirabinan kenê fotografê ci înan reyde est o. Badê hêrişê ke Dêrsim de pê destê walîtîye ame kerdene bi twîtî şexsê mi de vato 'terorîst' û mi sey hedefî ramojnayo. Eke gêreno terorîstêkî wa biewno xo ra.''

Alîcan Onluyî derheqê eşkerayîya WalîtîyaTuncelî de zî nê vatî: ''Oyo ke hûzûrê Dêrsimî xeripneno, o bi xo yo. Ciwanî kuçeyan de yenê kiştene, kadroyê tarîkat û cemeatan dezgehan de yenê cakerdene, warê bawerî binê nameyê restorasyonî de yenê texrîpkerdene û xoza û ganîyî tim raştê hêrişî yenê. Yew bajaro winayên de ganî senî hûzûr bibo. Ey bi xo wezîfe da grûbêka çeteye ke wa merasîmê cenaza de provokasyon vejo. Sûcdarîyê ke vera şexsê mi bîyî, ez red kena.''

Onluyî vat: ''Badê hêrişê polîsan rewşa mi bîye xirabe û ez şîya Nêweşxaneyê Dewlete yê Dêrsimî. Rixmo ke ez ameya derbkerdene. Bi talîmatê Serhekîmê Nêweşxaneyî Serkan Calpî rapor nêdîya mi. Bedelê ci çi beno wa bibo ma do tim wayîrê ercanê xo bivejîyê.''