Cenzaya cinîya kurde ya şorişgêre Aysele Dogane bajarê Kolnî yê Almanya ra bi rayîrê hewayî ameye ardene Amed. Cenaza hetê Hemsereka  DBPyî Salîha Aydeniz, Vervatoxa HDPyî Ebru Gunay, wekîlanê herême, atkvîstanê TJA, merdimanê Dogane û xeylêk kesan ra bi slogana ''Şehîdî Nêmirenî'' ameye verwazîkerdene û şawîyaye Dêrsimî.

Dêrsimîjî zî Pirdê Seyîdlî yê Mazgêrdî de ameyî vera cenaza. Konvoyê cenazaya Dogane rayîr de xeylêk rey nuqtayanê kontrolî de ameye vindarneye. Polîsan nuqtaya dekewtişê taxa Turişmekî de verê wesayîtê cenaza girewt û destûr nêda ke cenaza bêra berdene keyeyê Dogane yê taxa Gazîkî. Polîs kenê ke cenaza Goristanê Asrî de bêro definkerdene. Naye sero bi seyan kesan nuqtaya kontrolî de dest pê çalakîya roniştişî kerde.

Gama ke cenaza ameyêne pawitene wekîlê HDPyî Ebru Gunay û Omer Ocalan zî tede xeylêk kesî keyeyê Dogane ra helalîye girewt. Tîya waya Dogane Mensure Dogan û Ebru Gunay qiseykerdişêk kerd. Mensure Dogane vat çîyê ke vera cenaza benê nînê qebulkerdene, merdeyan rê bêhurmetîye kenê.

Ebru Gunay zî vat: ''Aysele Dogan peyê xo de mîrasêko gird verda. Maştêne nika pîya bi cenazaya xo merasîmêk bikerê. La senî şarê Dêrismî zî zano 1938î ran ata êyê ke yezîdîyîye kenê, hêrişê ziwan û bawerîya Dêrsimî kenê destûr nêda Dervîşa Dêrsimî Aysele Dogan keyeyê xo ra helalîye bigêro. Tehemulê înan Dêrsimî rê çîn o.''

Dima ra şarî verê xo da Goristanê Asrî. Bi seyan leşker û polîsan pê wesayîtanê zirxinan verê şarî girewt. Wesayîtê cenaza zî tîya ame vindarneye.  Badê pawitişê dergî şarî waşt pîya bi cenaz bikewo goristanî. Polîsan hêrişê şarî kerd. Mîyanê nê têmîyankewtişî de polîsan wesayîtê cenaza remna. Polîsan vat têna keyeyê Dogane eşkeno tewrê definkerdişî bibo. Rixmo ke wekîlanê HDPyî nêrazîbîyayîş mojna destur nêdîya înan. Cenaza têna bi tewrbîyayîşê keyeyê ci ameye definkerdene.