Hemserekîya Konseya Rayberdişî ya KCKyî semedê yadkerdişê Aysele Dogan eşkerayîye daye û nê pare kerdî:

''Hemraya ma ya erjîyayeye Aysele Dogan ya ke şorişgêranê verênan ê Têkoşînê Azadîye yê Kurdîstanî ra ya netîceya nêweşîye de şehîde bîye. Şehadetê ci zerrîya ma dejnaye. Ma hemraya xo Aysele Dogana ke heme emrê xo da Şorişê Azadîye yê Kurdîstanî bi hurmet yad kenê û soz danê ke têkoşîno ke aye bi eşqî rayra berdêne ma do bi serkewtişî tacîdar bikerê.

Aysele Dogan şorişgêra pîle bî ke heme emrê xo pê têkoşînî ravêrna. Cinîyêka xoverdayox, sereberz û têkoşere bî ke verê dişmenî de çirey milê xo çewt nêkerd. Semedê xelisîyayîşî şaran, cinîyan û merdimîye her qeyde bedelî dayî. Xeylêk wext zîndanan de mend la çirey verê zext û îşkenceyan milê xo çewt nêkerd. Sey hemraya Sakîne Cansiz û xoverdayoxanê 14ê Temmuze vera dişmenê faşîstî xover da û teslîm nêbîye. Bi zanayîşê xo yê xurtî, heskerdişê azadîye  û giredayîya têkoşînî tim embazêka nimûne bî. Bêteredut heme wezîfeyî girewtêne û berpisîyarîyê xo bi serkewtişî ardêne ca. Hişmendî û heskerdişê ci yê semedê welatî xorî bî. Zanayêne ke bîyayîşê  merdim û komelî têna pê  welat û komelê azadî mumkun o. Xeyalê ci azadkerdişê Kurdîstan, şarê kurd û cinîyan bi. Semedê nê xeyalî ciwîyaye û heta ke şehîde bîye semedê nê têkoşîn kerd.

Rayber Apoyî tim Aysele Dogan teqdîr kerd

Hemra Aysele Dogan zerrîya safî ra pabesteya Rayber Apoyî bî. Tim cehd kerdêne ke Rayber Apoyî fam bikero û goreyê nê têbigêro. Serra 1999î de bi vengdayîşê Rayber Apoyî bêteredut grûba haştîye ya diyîne de ca girewt û Ewropa ra şîye Tirkîya. Rixmo ke hemra Aysele zanayêne erzîyena zîndan tewiro wina erjîyaye ramojna û serkêşîya prosesê neweyî yo ke Rayber Apo waştêne bido destpêkerdene, kerde û tewr vernî de cayê xo girewt. Dewleta tirke ya faşîste vera na game hole nêzdî nêbî û Aysele Dogan û hemrayê ci tepiştî, eştî zîndan. Hemra Aysel zîndan de zî xover da û têkoşînê xo da domnayene. Rayber Apoyî tim Aysele Dogan teqdîr kerde, paşta ci aye ra pêt  bî û tim sey nimûne ramojnayêne.

Warê sîyasetê demokratîkî deyndarê Aysele Dogan o

Hemra Aysele Dogan averberdişê têgêrayîşê sîyasyîyî yê kurdan rê serkêşîye kerde. Xeylêk waranê sîyasetê demokratîkî de xebatî kerdî.  Semedê wayîrbîyayîşê  hişmendîya azadîye  û rêxistinkerdişê şarî aye keda pîle daye. Dewlete bi zextî kerd ke verê sîyasetê demokratîkî bigêro la aye semedê averdişê sîyasetê demokratîkî kerd xo çeng. Semedê wertevejîyayîşê nê tradîsyonî rolo pîl kay kerd.  Na mana de warê sîyasetê demokratîkî keda hemra Aysele rê zaf çî deyndar o. Hemra Aysele Dogan sey Têgêrayîşê Azadîye yê Kurdîstanî şehîda sîyasetê demokratîkî ya zî.

Hemra Aysele Dogan keyeyê Pîr Seyît Rizayî ra bî. Wayîrê ruhê xoverdayox û azadî yo ke teslîm nêbeno yê Dêrsimî bî. Seba ke Dêrsim newe ra qoqê xo ser bêro înşakerdene akademîya ke ameye ronayene rê serkêşîye kerde. Îqtîdarê faşîstî tehemulê nê xebatan nêkerd, akademî qefilna û hemra Aysele Dogan tepişte la aye têkişînê xo zîndan de domna. Sey Seyîd Riza, Besê û Zarîfeyan verê dişmenî de milê xo çewt nêkerd. 

Ma şexsê hemra Aysele Dogan û şehîdanê Menga Gulane de heme şehîdanê şoriş û azadîye bi hurmet yad kenê û veng danê ke semedê wayîrvejîyayîşê şehîdan wa têkoşîn bêro xurtkerdene.''