Pinare Mansurogluya ke warkênaya Aysele Dogan a ANFyî rê qala aye kerd.

Pinare Mansurogullari ard ziwan ke xala ci Aysele nêmeyê emrê xo zîndan de derbaz kerd, raştê îşkenceyê giranî ameye û vat: ''Xala mi Aysele dima ke zîndan de kanser bîya, tehlîye bîya. Aya ke dêrsimij a, kadroyanê verênan ê têkoşînê Kurdîstanî ra bîye. Xala mi Aysele embaza Sara, Mazlûm, Hayrî, Kemal, Ferhat,Viyane û bi hezaran kesan bîye. Aye zaf qîmet dayêne têkoşînê cinî û ciwanan. Waştişê ci yo peyên zî haştîye bi.

Xala mi 1999 de mîyanê Koma Haştîye de waştişê Rayberîye ser o agêrabî welatê xo. Aye DAKAD zî awan kerd û têkoşînê elewîyan û elewîtîya Dêrsimî kerd. Aye tim waştêne ke azadîya kurdan bîyara ca.  A torna Seyîd Rizayî ya, torna Şêx Seîdî ya. A hemraya gerîlayan bîye.

Nika Kurdîstan de operasyonê qirkerdişî est o. A nê operasyonî ra qerilîyayêne. Xala mi seba cuyêka rûmetêne têkoşîn kerdêne. Tewr peyên aye vatbi 'Merg zî heq o.' Heta peyêne hîşê ci sereyê ci de bi û çimê ci tim fotografê Rayberîye de bi. Aye tim qiseyê Rayberîye 'Wayîrvejîyayîşê Dêrsimî, wayîrvejîyayîşê Kurdîstanî yo' tekrar kerdêne. Aye tim polîtîkayê vera Dêrsimî ser o qisey kerdêne û ma rê wina vatêne: 'Xo vîr a mekerê.'

Ma do xala xo Dêrsim de, welatê xo de defin bikerê. Ma wazenê xala ma bi hawayêkê girseyî Dêrsim de bêra pêşwazîkerdene. Wayîrvejîyayîşê Aysele Dogan wayîrvejîyayîşê Dêrsimî yo û erkê her kesî yo. No erkê pêro dêrsimijan o.

A mamostaya fermandaran bîye. Aye Dêrsim de sere wedarit û uca de xo resna her kesî. Kesê wayîrqijdanî û hişmendî wa mîrasê aye war de meverdê. Aye zaf erkî girewtî xo ser û pêro zî ardî ca. Wa cayê ci cenet bo. Çîyo ke a nêeşkaya bikera, hînî keweno milê ma.

Reyna sereyê pêro Dêrsim, Kurdîstan, Têkoşînê Azadîye û Rayberîye weş bo.''