Cinîya kurda şorişgêre Aysele Dogana ke 11ê gulane de şehîde bîye, cenzaya ci merasîmêkî şawiyaya Dêrsimî.

Semedê Dogane bajarê Kolnî yê Almanya de hetê Têgêrayîşê Cinîyan ê Kurdan ê Ewropa ra merasîmêke ame kerdene. Merdimê Aysele Dogan, hemrayê ci, sîyasetmedar, hunermendî  û temsîlkarê dezgehanê kurdan zî te bi seyan kesî tewrê merasîmî bîyî. Cenazaya Aysele Dogan serê ermeyê cinîyan de bi slogana Cinî, Cuye Azadîye ameye heyate.

Warzaya Dogane Pinare Mansurogluya ke merasîmî de qisey kerd ard ziwan ke xala ci wesîyet kerdo ke cenazaya ci bişawîye Dêrsimî û wina vato: ''Sey hemeraynê ma yê ke koyan de şehîd bîyî mi zî bêşitiş  û bêkefen defin bikerê. Yew egela Rojawanî û vîstana sipîye ya cinîyan ê êzidîyan biancenê mi.''

Mansuroglu vat: ''Ma mînet nêkenê, ma ziwan, kultur û bawerîya xo wazenê. Xala mi nê emanetê ma kerdî. Ma rê vat 'Wayîrê ziwan, kultur, xoza û têgêrayîşê xo vejîyê.''  Xala mi vatêne 'êyê ke pê kurdan bawerîye nêkene wa hûma emir derg bido înan ke bivînê kurdî do senî ser kewnê.' Kam ke aye nas keno ez bawer kena heskerdiş û pabestîye ci reso înan. Çim û goşê ci tim kesanê ke raştê nehewîye yenê de bî. Sey keyeyê ci ma soz danê ke ma do wayîrê emanetê ci bivejîyê. Wa rehet bo.''

Mansurogulu  waşt ke  wa sereyê perûne berz bo, û çew mebermo û xala xo Aysele Dogan rê vat: ''Ma ti Dêrsimî rê kenê raşt. Wa dersîm to bipêşo, wa Munzur to bişo. Ma do wayîrê emanetê to bivejîyê, xo vîr ra mekerê, rayîrê to de şirê. Oxir bo.''

Bi nameyê hemrayanê ci zî Zozane Serhat qisey kerd. Serhate vat: ''Embaze Aysele heme emrê xo da nê têkoşînî. Waştêne ke çar parçeyan de cayo ke destê ci nêrasyo ci û kurda/o ke nêraseye ci wa memanê. Ma rê tim vatêne 'No qîm nêkeno ganî ma zafêr têkoşîn bikerê. Eke dişmen Kurdîstan de qirkerdişan keno no kêmayîya ma ya.''  Embaze Asel sey cinî, kurde û elewî heme nasnameyê xo sereberz kiriştî û wayîrê înan vejîyaye.''

Serhate vatişê 'Se beno wa bibo ma do ser bikewê, semedê nê ganî  ma têkoşînî xurt bikerê' yê  Aysele Dogan ard vîr û vat: ''Têkoşînê to ma rê sey mîrasî mend. Ewro bi mîlyonan wendekarê to yê, mîrasê to dewr girewt. Ma soz danê ke ma do têkoşînê to  xurtêr bikerê.''

Mersamo ke helê zertengî ciwîyaye de sloganê sey  ''Şehîdî Nêmirenê'', ''Cinî cuye, azadîye'' û ''Biciwîyo Rayber Apo'' ameyî eştene. Badê wendişê mesajê PAJKî Aysele Dogan bi tîlîlîyan Dêrsimî rê ameye raştkerdene.