Endama Komîteya Torra Zêrîne Adare Gabar bi wesîleya serrgêra Şorişê Jin, Jiyan, Azadî ANFyî rê qisey kerd.

Adare Gabar vist vîrî ke seba nê şorişî bedelê giranî ameyê dayene û vat: ''Seba ke ma gonîya şehîdanê xo erd de meverdê ganî dormeyê Şorişê Jin, Jiyan, Azadî de çemberêkê adirînî virazê. Serkêşîya Jin, Jiyan, Azadî de ganî têkoşînê azadîye geş bibo. Dişmen keno ke manaya nê şorişî pûç bikero û şarê ma tecrîd bikero. Azadîye bêbedelan nêbena. Ewro pêro krîzê Rojhelatê Mîyanênî rîyê îşxalkeran ra qewimîyenê. Sebebê krîzê Îranî zî no yo. Dewleta Îranî qetlîaman kena, cinîyan rê tecawuz kena. Dewleta Îranî wazena ke cinîyan çin bihesibna û meseleyanê cinîyan qij bivîna. Yeno xîretkerdene ke no çi mîyanê şorişî de zî vila bibo. Ganî vera ney ma bi têkoşîn û rêxistinî têbigêrê. 

Destpêkê şorişî de hunermendan rolê pîlî kay kerdî û bedelê pîlî dayî. Ewro zaf hunermend û roşnvîrî naye ra zîndanan de yê. Ganî hunermendî tim xizmetê şorişî bikerê. Ewro dewletî cinîyan kişene, koyan de vera gerîlayan çekê kîmyewî şuxilîyenê û Rayber Apo yeno tecrîdkerdene. Hunermend û roşnvîrî ganî vera ney tewirêkê xurtî bimojnê û rolanê xo bîyarê ca. 

Ganî hunermend û roşnvîrî yew bibê, xo rêxistin bikerê û welatî nêteriknê. Wa hunermendî bêrê ma şorişê azadîye xurt bikerê û vila bikerê. Bêrê ma bi ruhê neteweya demokratîke şerê şorişgêrî yê şarî berê asta tewr berze. Şorişê Jin, Jiyan, Azadî bi ruhêkê kultur û hunerî dest pêkerd û erjê kulturî vetî werte.  Dewleta Îranî kena ke huner xizmetê ci bikera. Ganî hunermend û roşnvîrî xo teslîmê nê ferasetî nêkerê. Hunermend û roşnvîrî ganî erjanê şorişî bipawê û aver berê. Seba azadîya cinîyan no lazim o.''