Sîyasetmedara kurde Aysele Dogan vizêr bajarê Kolnî yê Almanya de nêweşxeyo ke tede tedawî bîyêne de dinyaya xo bedilnayene. Badê şehadetê Dogane xeylêk dezgehanê kurdan,cinîyan û elewîyan bi eşkerayîyan dejê xo ard ziwan mesajê wayîrvejîyayîşê têkoşînê Dogane dayî.

TJK-E: ''Aysele Dogan zî sey Sara cinîya pêrodayîşî bî. Bawerîya xo de sey awe zelal bî, vera bêadeletîye û xeletîyan sey pezkovî rike bî.  Semedê cuya bianor çîyo ke destê ci ra ame kerd. Vatişê aye pratîkê ci bi. Cinîyêka pêrodayîşî bî ke hemrayê xo, welatê xo, Dêrsim û Rayberîya xo ra zaf heskerdêne. Ma do sey cinîyan kurdan rêçê aye de şirê.''

KCDK-E: ''Aysele Dogan torna Seyîd Rizayî bî, hemraya Mazlûm Dogan, Sakîne Cansiz, Atakan Mahîr, Sînan Dêrsim bî. Semedê heq û huqûqî rayra şîye û nê rayîr de bîye waştoxê haştîye ya unîversale.''

Yewîya Cinîyan ê Elewîyanê Demokratîkan: ''A embeza cinîyan ê bianor û sereberzan ê Dêrsimî bî ke xo zinaran ra eşt awa bimbarekê ya Munzurî.Têkoşînê Kurdîstanî, cinîyan, kizilbaşîye û têkoşînê dêrismijbîyayîşî de ercê raştî afernayî. Ma to xo vîra nîkenîmê! Oxir bo to rê, şo welate xo, şo Hardê Dewrêşî û mekanê jîyar û dîyara, şo herra maye û pîyê xo. Duzgun Baba, Fatma Ana, Haskar, Zîyara Jelê û embaze Sakîne to kenê meyman.''

Federasyonê Elewîyanê Demokratîkan: ''Canê ma Aysele Dogana ke vera zulmî  sere wedarit û rêçê Zarîfe û Sakîneyan de kewte heqîqet û azadîye  dima û pê têkoşînê xo rayîrê heqîqetî kerd bêmerg, şîya heqîya xo. Dejê ma pîl o, zerrîya ma vêşena. Sere de keyeyê ci wa sereyê şarê ma weş bo.''

Kongreya Înşayî ya Dêrsimî: ''Aysele Dogan çirey têkoşînê xo ra peyser game nêeşte. Rixmo ke emrê ci surgun û zîndanan de ravêrte aye tim ercê welat, şar û komelê xo pawitî. Cuya ci zaf zehmet bi la aye tim bi vindertişê xo moral dayenê şarê xo. Hemraya ma Aysele Dogan temsîlkaranê tewr erjeyayan ê nasnameyê cinîyan bî ke peyê xo de mîrasê têkoşînê xurtî verda.''