Emîne Şenyaşara ke mêrde û lajê ci hetê merdimanê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde roja 122. de nobeta edaletî rê dewam kena. 

Ewro endamanê Xîretê 78an ê ke Dîlok, Riha û Pirsûsî ra ameyî Keyeyê Şenyaşarî zîyaret kerd. Avûkatê keyeyî Serhat Kurt zî heyetê 78an reyde ame cayê nobete. 

Bi nameyê Cehdkerdişê 78an  Atîye Okay qisey kerd  û ard ziwan ke Tirkîya de qanûnî têna seba terefgîranê îqtîdarî yenê caardene. Atîye Okay pare kerd ke ê dewa teqîb kenê û hê hetê keyeyî de yê. Okaye vat:  ''Wayîrê wijdanî vanê hînî bes o, wa her kes verê qanûnan de têdûşt bo. Yew keye ame qetilkerdene. Hînî bes o bes.''

Ferît Şenyaşarî vist vîrî ke dosyaya qirkerdişî ser o hema zî bira nimite esta û vat: ''Dozgero newe ame tayînkerdene. Ma waşt ey reyde pêvînayîş bikerê la red kerd. Heta ke edalet bêro caardene têkoşînê ma do dewam bikero. Ma paştdayîş û destekê huqûqî wazenê.''

Wextê pêvînayîşî de polîsan pê kamerayn qeyd girewt. Emîne Şenyaşar naye ser o nêrazîbîyayîşê xo mojna û polîsan rê vat: ''Şima çira peyê kiştoxan de nîyê? Şorê qirkeran bitepişnê. Keyeyê ma de sûcdar çin o.''

Keyeyî hesabê xo yê twitterî ser o zî no mesaj pare kerd: ''Ma verê Qesra Edaletî ya Riha de têkoşînê 'heqî' danê. Dewaya heqî de serkewtiş qetî yo. No zulmo ke pê rayîrê muhakemekerdişî dewam keno selahîyetdarê wayîrwijdanî ci rê vajê vinde.''