Xeylêk bajarê Vakûrê Kurdîstanî û Tirkîya de serkeşîya HDPyî de bi aktevîteyan 1ê Teşrîna Verêne Roja Kobanê ya dinya ameye pîrozkerdene.

Amed de verê banê HDPyî yê Yenîşehîrî de eşkerayîye ameye dayene. Îdarekarê HDP û DBPyî yê qeza û aktîvîstê TJA tewrê ci bîye. Polîsan çalakwanî girewtî binê ablûqa la çalakwanan peyser game nêeşte û eşkerayîye daye. Wekîlê HDPyî yê Amedî Hîşyar Ozsoyî ke tîya qisey kerd vat: ''Erdoxan wazeno ke çîyo ke DAÎŞî nêkerd bikero. Coka beno ke hêrişê Kobanê bikero la xovrdayîşê Kobanê ke tarîx nuşto ewro ra tepiya çew/e neêşkeno bibedilno.''

Çewlîg, Dêrsim û Xarpêt  de panelî ameyî kerdene

Bi tewrbîyayîşê wekîlê HDPyî yê Şirnexî  Hasan Ozguneşî verî Dêrsim de dima zî Xaprêt de panel ame kerdene. Ozguneşî bale ante planê çînkerdişê kurdan û şaranê bînan ser û vat: ''Seba ke îqtîdarê xo bidê domnayene, hêrişê Kobanê kenê la şorişê Kobanê dewam keno. Sey vizêrî ewro zî do hêrişkarî vînî bikerê.''

Çewlîg de zî verî derheqê roje de eşkerayîye ameye dayene dima  banê partî de derheqê xoverdayîşê  Kobanê de panel ame kerdene. Hemserekê Pêroyî yê DBPyî Keskîn Bayindir û endamê Heyetê Meclîsê HDPyî Murat Aydin sey panelîstî tewrê ci bîyî. Panel de şehîdê Kobanê ameyî vîrardene û ame vatene ke kurdî ça benê wa bibê xoverdayîşî canêverdenê.

Reyna Riha, Mêrdîn, Şirnex, Wan,Sêrt, Îdir û xeylêk bajaranê Kurdîstanî de û bajaranê sey Ankara, Adana, Konya û Mersin de zî derheqê xovrdayîşê Kobanê de aktîvîteyî ameyî kerdene û xoverdayîşo tarîxî ame selamkerdene.