Rêxistina HDPyî ya Îstanbulî Seyîd Riza û embazê ey serrgêra 83. ya dardekerdişê înan de Meydanê Tunelî yê Taksîmî yê Îstanbul de yad kerdî. Wekîlê HDPyî Zuleyha Gulum, Musa Pîroglu, Hemserekê HDPyî yê Îstanbulî Erdal Avci û Elîfe Bulut, Vervatoxa HDKyî Îdîle Ugurlu û xeylêk temsîlkarê partî û rêxistinan tewrê merasîmê yadkerdişî bîyî.

Merasîm de fotografê Seyîd Rizayî ameyî berzkerdene, pankarta bi nuşteyê 'Birê Mehkemeya Îstîklalî ya Xarpêtî wa nêrê hesibnayene' ameye akerdene û bi findan '38' nusîya.

Erdal Avciyî merasîm de qisey kerd û vat: ''Gereka dewleta tirke bi hawayêkê fermîyî dêrsimij û kurdan ra efûya xo biwaza, gorê kokimanê ma bêrê eşkerakerdene û eşyayê înan ê taybetî bêrê dayene ma.Mustafa Kemal Ataturkî Seyîd Rizayî rê vatbi ke eke o ci ra uzrê xo biwazo Ataturk do ey û keyeyê ci bierşawo surgun. La Seyîd Rizayî ci rê vat: 'Mi seba waştişê uzrî çîyêk nêkerd.' Seyîd Rizayî qiseykerdişê xo yo tarîxî uac de kerdbi.''

Avciyî waşt ke seba ke pêro qirkerdişî bêrê cigêrayene ganî Komîsyonê Heqîqatî bêro ronayene û îfade kerd ke ê do mîrasê xoverdayîşê Terteleyê Dêrsimî aver berê.

Elîfe Bulut zî ard ziwan ke heta ke nê qirkerdişî bêrê roşnîkerdene ê do têkoşînê xo dewam bikerê.

Îdîle Ugurlu zî da zanayene ke Seyîd Rizayî wexto ke darde bîyêne mesaj da şorişgêran ke çok nêdê erdî ro.

Wekîlê HDPyî yê Îstanbulî Musa Pîrogluyî zî wina qisey kerd: ''Dewlete sey vizêr ewro zî vera elewî û kurdan de ya. La ma ewro zî peyê Seyîd Rizayî de yê. Çunke ma wayîrê vatiş û pêrodayîşê ci vejîyenê. Ma zanenê ke êyê ke vera zulmî zanî nêşîyî erdî ro ewro ser kewenê. Ewro tek rayîrê xoverdayîşî no yo. Ma do nika hesab bipersê.''

Qiseykerdişan ra dima seba Seyîd Riza û embazanê ci 3 deqatan çalakîya bêvenge ameye kerene. Hunermend Dogan Çelîkî bi kirdkî lorikêk vat.

Merasîm pê sloganê 'Dêrsim xo vîr a mekere, meverde vîr a şoro' qedîya.