Tepişteyanê PKK û PAJKî 27ê teşrîna peyêne de zîndananê Tirkîya û Vakurê Kurdîstanî de vera tecrîdkerdişê Rayberê Şarê Kurdî Abdullah Ocalanî û binpaykerdişê heqanê tepişteyan grevê vêşanîye dabi destpêkerdene. Grev roja 50. de dewam keno.

Dima ke grevî dest pêkerd îqtîdarê AKP-MHPyî zî hêrişê xo dayî destpêkerdene. Grevê vêşanîye ra verî Amed, Mêrdîn, Sêrt, Şirnex, Wan, Anqara, Îzmîr, Meletî û Êlih de operasyonî ameyî kerdene; Hemserekê Komeleya Paştdayîşê Keyeyanê Tepişteyan û Hukumwerdeyan a Marmara (MATUHAYDER) Husnu Taş û xebatkarê komele zî tede tewr tay 60 kesî ameyî destbendkerdene.

Tepişteya Zîndanê Mersînî Burcane Aslan, Hatîce Kaynak û Fatma Bese; Zîndanê Îzmîrî ra Sertaç Kiliçarslan, Ozan Alpkaya û Abdullah Gunay; Zîndanê Kandira ra Wekîlê verênî yê HDPyî yê Amedî Çaglar Demîrelî û Sehere Orçu 27ê teşrîna peyêne de da zanayene ke înan dest pê grevê vêşanîye kerdo.

Çalakîkeranê verênan ra Nurcane Aslan na eşkerayîye kerde: ''Azadîya Rayberê PKKyî Ocalanî azadîya şarê kurdî ya. Wext wextê azadîye yo. Ma vanê 'hêdî bes o'. Ma do xo ver bidê û eke hewce bibo nê oxirî de bimirê. Tecrîd 20 serrî yo dewam keno. Wa şarê ma hînî vajo 'bes o'. Moralê ma ca de yo. Xoverdayîş ciwîyayîş o.''

Bi beşdarîya tepişteyanê zîndanan ê cîyayan koma 2. 2ê kanûne de çalakîye dewr girewte.

Nê mîyanî de hêverî ciwan û cinîyî wayîrê xoverdayîşê tepişteyan vejîyayî. Têgêrayîşê Cinîyan ê Azadan (TJA) pê eşkerayîyêke grevê vêşanîye rê selam kerd û vat: ''MA venga pêro rêxistin, dezgeh û rayaumûmîye danê ke vera nê grevê vêşanî bêveng nêmanê û paştî bidê tepişteyan.''

Meclîsê Ciwanan ê HDPyî yê Peyasî zî pê meşaleyan rayîrî ra şi û paştî da grevê vêşanîye.

Dima keyeyê tepişteyan û Mayê Haştîye wayîrê  grevê vêşanîye vejîyayî. Înan bi sloganê 'Ocalanî rê Azadîye' çalakîyî kerdî û vat: ''Waştişê domananê ma waştişê ma yê.''

Barcî zî dezgeh, partî, rêxistin û kesê demokratîkî wayîrê  grevê vêşanîye yê zîndanan vejîyayî.

Îşkence zêdîya, qerardarîye dewam kerde

Hewteyê verênî yê xoverdayîşî ra dima Zîndanê Gebze ra Hatîce Arat pare kerd ke vera  grevê vêşanîye teda zêdîyaya û venga rayaumûmîye da ke wa hîsger biba.

Heman rojan de Zîndanê Eskîşehîrî ra Davut Barînî zî da zanayene ke înan rê sole, lîmon nêdîyenê û dest nîya hewcedarîyanê înan ê rojane.

Zîndanê Kayserî ra Mehmet Kurt (49) keyeyê xo rê wina qala teda kerde: ''Pêro heqê ma destê ma ra gêrîyayî. Tedayî zêdîyenê. Dest nîya televîzyon, radyo û hacetê têkilîye ser û rojname nêdîyeno ma. La heta tecrîd wedarîyo ma xoverdayîşê xo dewam bikerê.''

Zîndanê Rîze ra Serhat Karsuyî vat: ''Ma bi armancê wedaritişê tecrîdî  grevê vêşanîye kenê. Heta ke waştişê ma bêrê caardene ma do bi qerardarî çalakîya xo dewam bikerê.''

Menga 1. ya xoverdayîşê zîndanan de Zîndanê Alanya de 9 tepişteyan ê cinîyan ê grevê vêşanîye rê cezaya zîndanî dîyayî.

Zîndanê Kalkandere yê Rîze de Umut Savaş Koçyîgîtî eşkera kerd ke pêvînayîşê ci yê telefonî ame astengkerdene, ci rê cigêrayîşo rût ame ferzkerdene.

Goreyê zanayîşann heta peynîya kanûne nêzdîyê 2 hezar û 500 tepişteyî tewrê  grevê vêşanîye bîyî.

Mexmûr û Lavrio de zî grevê vêşanîye

Grevê vêşanîye yo ke vera tecrîdê Îmraliyî Kampa Şehîd Rûstem Cûdîyî ya Mexmûrî de hetê Keyeyanê Şehîdan ra 18ê kanûne de dîya destpêkerdene  bi coş û qerardarî dewam keno. Grevê vêşanîye yê Mexmûrî roja 29. de yo.

Kampa Lavrioyî ya Yunanîstanî de zî kurdan vera tecrîdê Îmraliyî û paştdayîşê tepişteyan dest pê grevê vêşanîye kerdbi. Grevê vêşanîye yê Lavrioyî zî roja 12. de dewam keno. Grev rayberîya Têgêrayîşê Ciwanan ê Şorişgêran (TCŞ), TJK-E û Merkezê Kulturê Kurdan de yeno kerdene.