Kongreya 6. ya DBPyî dewam kena. Kongre de heta nika Hemserekê Pêroyî yê HDPyî Mîthat Sancarî, Hemserekanê DBPyî Salîha Aydenîz û Keskîn Bayindir, Hemvervatoxa HDKyî Esengule Demîr qisey kerd.

Sancarî qiseykerdişê xo de bale ante yewîya neteweyîye ser û vat: ''DBP parçeyêkê HDPyî yo. Yewîya ma bi hêzê şarî yena pê. DBP mesuldarîya caardişê yewîya neteweya kurdan ano ca. Vera tecrîd û teda rolê DBPyî pîl ê. Tirkîya de demokrasî pê haştîye û çareserîya meseleya kurdan mumkîn a. Vera têgêrayîş û partîya ma hêrişê pîlî estê. La ma do qetî têkoşînê azadîye ra tawîz medê.''

Bayindirî vat: ''Kongreya neteweyîye hînî nêeşkena bêra taloqkerdene. Ma venga pêro partîyan û temsîlkaran danê ke ma amade yê ke mesuldarîya viraştişê na kongre bigêrê xo ser. Modelê Konfederalîzmê Demokratîkî tek çare ya. Perwerdeyê bi ziwanê dayîke waştişo verên ê kurdan o, seba nê heqî ma do têkoşîn bikerê. Ma sey DBPyî vera îqtîdarî 'Rayîrê Hîrêyînî' pawenê. Kurdî û demokratî ronayox û rayberê nê rayîrî yê. Demokratîkbîyayîşê Tirkîya û azadîya Kurdîstanî pabesteyê yewbînan ê. DBP wazeno sere de Birêz Ocalan pêro tepişteyê sîyasîyî wa bêrê veradayene. Seba çareserîya meseleya kurdan muzakere lazim o, muxatabê nê muzakerayn zî Birêz Ocalan o û adresê ci zî Meclîs o.''

Hemsereka DBPyî Salîha Aydenîz vat: ''Tek rayîrê çareserîya meseleyanê Kurdîstanî caardişê yewîya neteweyî yo. Ganî verî kongreya neteweyîye bêra pêser. Ma amade yê ke mesuldarîya ney bigêrê xo ser. Ma îfade kenê ke wa bi qanûnê bingeyî yê neweyî statuyê kurdan bişinasîyo. Perwerdeyê bi ziwanê dayîke xeta ma ya sûr a. Ma do qetî têkoşînê cinîyan ra zî apey gamêke nêerzê. Na seserre do biba seserra kurdan.''

Hemvervatoxa HDKyî Esengule Demîr zî pare kerd ke çareserîya meseleya kurdan de muxatabo verên Rayberê Şarê Kurdî Abdullah Ocalanî yo. Demîre venga her kesî da ke vera hêrişanê Rûsya hetê şarê Ukrayna de ca bigêro.