Komîsyonê Zîndanan ê ÎHDyî ra Yazmaciyî pare kerd ke grevê vêşanîye yê vera tecrîdî 107 zîndanan de dewam keno û beno ke bêdem bibo. Yazmaciyî vat ke dewlete pê stratejîya 'çareserîya yewîne nçareserî ya' têgêrena.
Komîsyonê Zîndanan ê Komeleya Heqanê Merdiman (ÎHD) ra Omer Faruk Yazmaciyî ANFyî rê qisey kerd û grevê vêşanîye yê zîndanan ercna.
Avûkat Yazmaciyî ard ziwan ke pê rejîmê neweyî yê înfazî tecrîd pêro zîndanan de vila bîyo, ameyo girankerdene û vat: ''Mîsal êyê ke cezaya muebede ya girankerde girewte mumkîn nîyo ke têna bimanê labelê pê bira heyetê çimdarîye têna manenê. Heman çi semedê tepişteyanê nêweşan zî wina yo. Tepişteyê ke ganî her roje şorê kontrolî binê tecrîdî de yê.''
Yazmaciyî bale ante grevê vêşanîye yê vera tecrîdî ser û vat: ''Grevê vêşanîye 15 rojan de pê dore yeno kerdene la dima 15 rojan cezaya qedexeyê dîsîplînî, hucreyê yewkesî yena dayene tepişteyan. Sîncan de tepişteyê cinîyî semedo ke tewrê grevî bîyî pê sûcdarîya 'wesifnayîşê sûc û sûcdarî' kewtî verê dewa. Tecrîdê Îmraliyî yê vera Birêz Abdullah Ocalanî kerdişêko taybet o û vera qanûnan o. No tecrîd zêdêr yeno girankerdene.
Ma derheqê grevî de muracatê Neteweyan ê Yewbîyayeyan, CPT û dezgehanê bînan kerd. La dewlete pê stratejîya 'çareserîya yewîne nçareserî ya' têgêrena. Têna hewteyêk de înfazê 12 tepişteyan ame betalkerdene û veradayîşê înan ame betalkerdene. Coka grevê vêşanîye 107 zîndanan de dewam keno. Beno ke grevê vêşanîye bibo bêdem. Ganî ma vengê xo zêdê vejê. Ez venga her kesî dana ke bi hîsgerî têbigêro.''
