Serekê Konseya Merkezî ya Yewîya Tabîbanê Tirkan (TTB) Şebneme Korur Fîncanci  seba ke waştbi ke hêrişê kîmyewîyî bêrê cigêrayene tepişîyabi. Yewîya Tabîbanê Almanan Erdoganî rê mektubêk şawit û waşt ke Fîncanciye vera bidîya.

Mektub de yeno vatene ke waştişê Fîncanciye çarçewa azadîya fikran û îfadeyan de yo û bi tepişîyayê aye azadîya fikr û îfadeyan ameya binpaykerdene û xoserîya karê doktorîye rê hêriş ameyo kerdene. Mektub de ame vîrvistene ke heqê doktoran est o ke derheqê binpaykerdişanê heqanê merdiman de qisey bikerê û no erkê pêro doktoran o.  

Mektub de ca dîya ke Yewîyanê Tabîban a Berlin, Hessen û Hamburgî, IPPNW, Komeleya Tabîbanê Demokratan (VDAA) û Sendîkaya Wendekaranê Tibî û Tabîban zî wazenê wa  Fîncanciye vera bidîyê.