Wekîla verêne ya HDPyî Sîbele Yîgîtalp derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Sîbele Yîgîtalp pare kerd ke zîndanê Tirkîya û Vakurê Kurdîstanî vurîyayê îşkencexaneyî û ard ziwan ke tecrîdê vera Rayberê Şarê Kurdî pêro zîndanan rê vila bîyo. Yîgîtalpe vat: ''Her ke tecrîdê vera Birêz Ocalanî dewam keno, teda û binpaykerdişê heqanê merdiman zî dewam kenê. Abdullah Ocalanî ra 21 mengî yo xeberêke nêna girewtene, no zî mîyanê şarî de bîyo ters û qesawetî. Her ke tecrîd dewam keno îşkence, teda, hêrişê îşxalî yê vera Başûr û Rojawanê Kurdîstanî zî do dewam bikerê.

Sey komployî sîstemê tecrîdî zî wayîrê karakterêkê mîyanneteweyî yo. Dewleta tirke baş zanena ke Birêz Ocalan îradeyê bi mîlyonan kesan o, rayber û serkêşê dîyaloganê haştîye yo. Aktorêko pîl o ke bi mîlyonan îmzayî seba ci arê dîyayê û bi vateyê 'O îradeyê ma yo' teslîmê Meclîsê Tirkîya ameyê kerdene. Tecrîdêko hende girankerde nêno qebulkerdene.''

Sîbele Yîgîtalp nêzdîbîyayîşê CPTyî rexne kerd ke eşkera nêkerdo ke Îmrali de Ocalanî de pêvînayîş kerdo yan nê. Yîgîtalpe ard ziwan ke bi mîlyonan merdimî derheqê rewşa Rayberê Şarê Kurdî Abdullah Ocalanî de qerqilîyenê coka ganî CPT Îmraliyî ser o eşkerayîyêke bido.