Gokhan Yildirim bi waştişê muhakemekerdişê edîlî rojeyê mergî de yo. Yildirimo ke resayo asta krîtîke ya rojeyê mergî, 11 rojî yo xîret keno ke bierşawîyo Zîndanê Rehabîlîtasyonî (Tîpê Ryî).

Kekê Gokhan Yildirim Erkan Yildirimî derheqê rewşa birayê xo de ANFyî rê qisey kerd û da zanayene ke birayê ci nêweşxane de mîyanê şertanê tecrîdî de tepişîyeno.

Erkan Yildirimî pare kerd ke kekê ci birînanê lingê xo ra nêeşkeno şoro û pê sendalyaya tekerlekîne eşkeno têbigêro. Yildirimî pare kerd ke odaya birayê ci de tuwalet çin o ke coka seba tuwaletî ey benê korîdorê nêweşanê Korona. Yildirimî îfade kerd ke rewşa birayê ci bena xirabêr û vat: ''Sîstemê pawitişê bedenê ci bîyo qels. Wexto ke wedarîya nêweşxane 3 rojan şeker û lîmon nêdîya ci. Janî kenê bahane coka ez nêeşkena şora zîyaretê ey. Roja îneyî 5 deqayan mi o dî. Moralê ci ca de bi la halê ci çin bi. O mîyanê şert û mercanê tecrîdî de yo.''

Yildirimî bale ante ser ke Nêweşxaneyê Şaristanî yê Tekîrdagî û Dezgehê Tipê Edlîyî (ATK) raporê 'eşkeno zîndan de bimano' dabi birayê ci û ard ziwan ke nê birê raporî sîyasî yê. Yildirimî vat: ''Eke birayê mi bierşawîyo Tîpê Fyî hînî têna tepişîyeno û terkê mergî beno. Wazenê uca de Gokhanî bikişê. Coka seba dermankerdişê ey çîyêkî nêkenê.''