Sereka Komeleya Heqanê Merdiman (ÎHD) a Îstanbulî avûkate Gulserene Yolerî derheqê rewşa peyêne ya tepişteyan de ANFyî rê qisey kerd.

Yolerî eşkera kerd ke binpaykerdişê heqanê tepişteyan zêdîyayî û nimnayenê. Yolerî pare kerd ke seba ke pêvînayîşî ameyî sînorkerdene, mektubî yenê astengkerdene derheqê rewşa zîndanan de bi hawayêkê qîmî xeberî nênê girewtene.

Gulserene Yolerî vat: ''Binê şert û mercanê Korona de tepişteyî stresî ra zêdêr bîyî qels. Tepişteyê muebede têna eşkenê saetêke warê hewagirewtişî de bimanê, tepişteyê nêweşî zî nêeşkenê heqê tedawî ra îstîfade bikerê. Prosesê janî de zêdêr heqê tedawî yê tepişteyan ameyî binpaykrdene. Bi bahaneya janî tepişteyê nêweşî ya sewqê nêweşxaneyî nêbenê yan zî wextê sewqê zîndanan de bi sereyê xo karantîna de cagênê.''

Yolerî mergê polîso ke hucreyê karantîna de merdo, vist vîrî û vat: ''Caardişê karantîna her sewqî de yeno caardene. Eke rewşa tepişteyan biba giranêr hucreyê karantîna de yena  veradayene. Sey ê tepişteyê polîsî vera pêro tepişteyan tehluke esto. Tepişteyî hînî nêwazenê şorê nêweşxane zî. Çunke koxûşê karantîna qerebalix o. Tepişteyê sîyasîyî zî hucreyê yewkesî de vera dîyenê. Vera tepişteyan zaf cîyakerî yenê kerdene. Her ke şino tepişteyî zêdêr terkê mergî benê û tepişteyê nêweşî zî nênê weşkerdene. La ganî tepişteyê ke kategorîya bitehluke de yê, ganî bêrê veradayene. Caardişê cezaya hukmkwerdeyan eşkîyeno bêro taloqkerdene û tepişteyî zî eşkîyenê bi şertê kontrolê edlîyî bêrê veradayene.''