Roniştişê dewaya Hemsereka HDPyî ya esîre Fîgene Yuksekdag ewro Mehkemeya Cezaya Girane ya 16. a Anqara de ame dîyene.Yuksekdage bi SEGBÎSî beşdara mehkeme bîye. Wekîlê HDPyî yê Agirî Abdullah Koçî û Wekîlê HDPyî yê Muşî Mensur Işikî zî roniştiş teqîb kerd. Mehkeme bira daye ke tepiştişê Yuksekdage dewam biko û dewa taloqê 10ê adare kerde.

Pawitişê Yuksekdage ra çend noqtayî wina yê:

"Vera partîya ma tewir bi tewir operasyonî ameyî kerdene. La destsernayîşê îradeyî metodê înan o cîya yo. Bi tayînkerdişê qeyûman mudaxeleyê temsîlîyetî kenê. Ma hema zî bi nê prosesî hedefê nê hêrişan ê. Bi krîmînalîzekerdişî û hedefkerdişî 33 şaredarîyê ma ameyî xespkerdene. No îqtîdar bi qeyûman hêrişê sîstemê hemserekîye kerd û vera îradeyê cinîyan darbe kerde. Mîyanê nê şert û mercan de ma do bêşik û bi qerardarîye şorê serê celadî û zulmê ey rîyê ci rê biqîrê. Ma şarê xo ra bawer kenê, şarê ma zî xo ra bawer keno.

Ma vatêne ke 'no tecrîd têna Ocalan ney şima zî tecrîd keno. Eke şima vera Îmrali polîtîkaya ber û dêsî bixebitnî na şima tecrîd kena.' Ewro îqtîdar mîyanê tênatîye de yo. Wextêk dewlete nêverdayêne Ocalanî reyde pêvînayîş bêro kerdene. 7 hezar tepişteyî grevê vêşanîye kerd û dima Ocalan reyde 4 pêvînayîşî ameyî kerdene. 3 mengan ra nata Îmrali reyde pêvînayîşî nênê kerdene. Dewlete eşkera kerd ke kayê xo yê neweyî de Îmrali sey hacet bixebitna. Ez îqtîdar reyna îqaz kena ke bi hêvîya azadîye kay meke, aye hacetê îqtîdarê xo meke. Ocalan vatbi 'Hewteyêk bidê mi ez nê pêkewtişî çareser kena. Nika her cayê Tirkîya de pêkewtiş esto.

Mabênê serranê 2013-2015î de zî Abdullah Ocalanî eşkerayîyêka winasêne kerdbi û o wext aramîye amebî caardene.Efrîn qîm nêkerd dewlete Rojawanî îşxal kerd. 300ê înan sivîlî 1000 kesî merdî. Goreyê Wezîrê Karanê Zereyî teror tewr nêqedo. Çunke eke biqedo ê zî qedîyenê. No şer heta çi wext dewam biko? Seba ke Tirkîya de haştîye bêra awankerdene sîaseto faşîst biqedo û têkoşînê demokrasîyî her ca de bibo. Ma sey HDP destê ma ra çi bêro ma do bikerê.Eke ma wayîrê heqê xo yê ciwîyayîşî nêbê ma do bibê esîrê îqtîdarî. Ma do çarenusê xo teslîmê nê îqtîdarî nêkê."