YXK û JXK’î bi eşkerayîyêka nuştekîye vist vîrî ke dewleta Tirkî 9'ê Teşrîna Verêne ra nata xîret kena ke Vakur û Rojakewtena Sûrîye de Kurdan qir bike û semedê tewrbîyayîşê çalakîyanê 2'yê Teşrîna Peyêne veng da.

Eşkerayîye wina ya: "Armancê dewleta Tirkî çinkerdiş û qirkerdişê Kurdan o. Tepîya ancîyayîşê leşkeranê Amerîka û bêvengîya dewletanê NATO reyde hêriş û îşxalkerdişê Erdoganî û çeteyanê ey rê rayîr ame akerdene. Erdogan wazeno şarê Rojawanî koçber bike. Her çiqas dewleta Tirkî bi çekanê xo yê giranan hêriş bike zî, hêzê QSD'yî û şarê Rojawanî bi xoverdayîşêko pîl û tarîxî xo ver danê. Her cayê cîhanî xoverdayîşê Rojawanî rê veng da. Seba ke rewşa Rojawanî bêra verê çiman, her roje bi des hezaran merdimî her ca de verba îşxalkarîya çeteyanê Tirkî protesto kenê. Ganî vengê ma bireso pêroyê cîhanî. Çalakîya ma bibe veng û hêzê seba şarê Rojawanî. Ganî ma sey ciwanan hêzê xo bikê yew û seba Xoverdayîş û Haştîya Rojawanî dest bi çalakîyan bikê. Ganî hêrişê îşxalkarîye yê verba şarî qet nêrê qebulkerdene û her ciwan her ca de bi berpirsîyarîya rayberîye û rûhê şorişgêrîye tê bigêre. Ma sey YXK û JXK veng danê: Şima zî 2'yê Teşrîna Peyêne de tewrê rayraşîyayîşê seba xoverdayîşê Rojawanî bibê. Kamca de çalakîye estbe, tewrê ci bibê û vengê xo seba Rojawanî berz bikê. Rojawan têna seba şarê Kurdî hewce nîyo, Rojawan bîyo nîşanê têdûştîye, ekolojî û cuya azade."