Ferît Şenyaşar û Emîne Şenyaşara ke mêrde û di lajê ci hetê merdimanê Wekîlê AKPyî Halîl Îbrahîm Yildizî ra ameybî qetilkerdene, verê Edlîyeya Riha de Nobeta Edaletî rê dewam kena.

Ferît Şenyaşar roja 595. ya Nobeta Edaletî de reyna verê Edlîyeya Riha de bi. Emîne Şenyaşar seba ke nêweş bîye nêeşkaye tewra nobete biba.

Hewteyê vîyarteyî de polîsan 'kuçeyê edaletî' yê keyeyî girewtbi binê ablûqa û amebi kerdene bi otopark. Ewro zî zabitayanê Şaredarîya Riha ya AKPyî pankarta ni nuşteyê 'Keyeyê Şenyaşarî rê edalet' xesp kerde. Polîsan vat ke serdozger pankarte ra qayîl nîyo.

Ferît Şenyaşarî naye ser o pankarta ke ser de fotografê Haci Esvet, Adil û Celal Şenyaşarî est ê, daliqnaye barîyeran û vat: ''Bê hişyarîye dest nîya pankarta ma ser. Ma naye qebul nêkenê. Êyê ke na pankarte ra qayîl nîyê wa ê bînayan de romenişê. Wa ê edaletî bîyarê ca, ma zî şorê keyeyê xo.''