Bi taybetî grevê vêşanîye yê vera tecrîdê Îmraliyî ra dima tedaya zîndanan zêdîyaye.

Zîndanê Bakirkoyî de 4 kitabê kurdkî yê Selîm Temo, Evîne Şîkakî, Alî Aydin Çîçek û Soran Amedî seba ke kurdkî yê hetê îdareyê zîndanî ra nêameyî qebulkerdene. Kitabî hetê merdimêka ci ra tepişte Reyhane Çoşmuş rê erşawîyabî.

Îdarekara Komeleya Paştdayîş û Hetkarîya bi Keyeyanê Tepişteyan a Marmara (TUHAYDER) şîye zîyaretê Reyhane Coşmuş û derheqê mesele de Jinnews rê qisey kerd.

Fatma eşkera kerd ke kitabê kurdkî zîndanan de qedexe yê û vat: ''Îdareyê zîndanan vanê 'kitaban biaçarnê wina bîyarê.'  Nê 4 kitabî zî bibandrol ê û kitabê şîîr, cigêrayîş û gramerî yê.  Rewşa zîndanan zaf xirab a û tede xeylêk meseleyî estê. Nika tepişteyî grevê vêşanîye de yê û wazenê tecrîd wedarîyo û kerdişê xirabî biqedê. Mi seba pêvînayîşê tepişteyan muracat kerd la qebul nêbi. Keyeyan ra zî qodê HESî yeno waştene. La keyeyî nêeşkenê nê qodî bixebitnê. Ganî komel vera rewşa zîndanan tewirê xo bimojno. Têna pê keyeyan nêbeno. Ganî ma bêveng nêmanê.''