Zîndanan de hêrişê dewlete zêdîyenê. Ewro reyna zînananê  Dîlok, Mersîn, Manîsa û Wanî ra xeberê binpakerdişê hewan û îşkenceyî ameyî.

Dîlok

Tepişteya bi nameyê Gulîstane Al bi rayîrê avûkatanê ÎHDyî pare kerd ke Zîndanê Dîlokî de heqê tepişteyan yenê binpaykerdene û gardîyanî vera tepişteyan muameleyê xirab kenê, tepişteyan bi vatişê 'Ma do şima bikişê' gef kenê. Avûkatan da zanayene ke waştişnameyê ke derheqê binpaykerdişanê heqan de nênê caardene. Tepişte Ale îfade kerd ke zîndan de nêweşî, îxtîyarî estê û koxuşanê 6 kesan de 10 kesî manenê. Ale vat: "Dermanê nêweşan nênê dayene. Heqê ma yê kantînî û kincî bi hawayêkê keyfî hetê îdareyê zîndanî ra yenê binpaykerdene. Gardîyanî bi hawayêkê zorî kenê ke caardişê 'kartê nasnameyî' bidê kerdene. Seba ke ma tepişteyê sîyasîyî yê bi hawayêkê cîya vera ma têgêrenê û  ma rê gef wanenê vanê : 'Şima kam ê? Ma do şima bikişê. Şima sucdar ê.' "

Wan

Îdareyê Zîndanê Wanî kitabê Orhan Kemalî, Turgenyevî û ê Mehmet Uzunî zî tede kitabê 5 nuştoxan nêgirewtî zîndanî. Kitabî sey 'madeyê qedexeyî' ameyî îfadekerdene û nêameyî girewtene zereyê Zîndanî. Kitabî tepişteyê Hakan Arslanî rê amebî erşawitene. Îdareyê Zîndanî kargoyê kitaban ser o  ''madeyê qedexeyî'' nuştî û bêsebebêk kargo tepîya erşawit.

Mersîn

Serekê Şubeyê Mersînî yê ÎHDyî Hakki Demîrî pare kerd ke derheqê binpaykerdişê heqan de muracatê tepişteyan benê zêde. Demîrî ard ziwan ke Zîndanê Mersînî de tepişteyê nêweşî sewqê nêweşxaneyan nênê kerdene, yan zî bi kelemçeyan yenê sewqkerdene. Goreyê raporê Komîsyonê Zîndanan ê Merkezîyan ê ÎHDyî zîndanan de hezar û 334 nêweşî estê. Goreyê Demîrî na hûmara bena zêde û Zîndanê Mersînî ra muracatê tepişetayan ê nêweşan zî vera zêdîyenê. Demîrî vat ke tepişteyê nêweşî maruzê heqaretan û derban manenê û 14 tepişteyanê nêweşan muracatê înan kerd ke heqê înan ê weşkerdişî yenê astengkerdene. Demîrî vist vîrî ke ÎHDyî raporê derheqê tepişteyanê nêweşan de pêşkêşê meclîsî, Wezaretê Edaletî û Odaya Yewîya Tabîban kerd la hema netîceyêk nêgirewt.

Manîsa

Tepişte Halîl Aydemîro 2ê kanûne de Zîndanê Manîsa ra amebi veradayene, derheqê cigêrayîşê zitî, cezayanê hucreyî, hûmaritişê leşkerî yê Zîndanê Manîsa de qisey kerd û vengdayîşê paştdayîşî kerd. Aydemîrî vat: ''Wexto ke ez kewte zîndanî gardîyanan bi vatişanê 'Ma şima ra birûmet ê, ma çi biwazê eşkenê bi şima bikê' mi rê heqaret kerd. Heqê ma yê pêvînayîşan ameyêne astengkerdene. Sebebê nê astengkerdişan ra yew zî xebitnayîşê kurdkî bi. Waştişnameyê ma yê gerrayan nêameyêne teslîmkerdene."