Tepişte Hogir Batu Zîndanê Îdirî de vera îşkenceyî 65 rojî yo girevê vêşanîye de yo. Eynî zîndanî de di tepişteyanê bînan dest pê girevî kerd.

Hogir Batuyo ka Dewaya Nisêbînî ra cezaya muebedê giranî dîyaye ci  23ê kanûne de Amedî ra surgunê Zîndanê Îdirî bibi.  Batuyî tîya seba ke raştê îşkenceyê cigêrayîşê rûtî ame 24ê kanûne de dest pê grevê vêşanîye kerd. Batu roja çarine ya  çalakîye de çimeyê sungerînî de hetê gardîyanan ra îşkence dî. Çalakîya Batuyo roja 65. de ya.

Hetê bînî ra eynî zîndanî de Firat Gereklî û Mazhar Metînî  zî seba ke heqê înan yenê binpaykerdene 16ê sibate de tewrê çalakîye bîyî.

Komeleya Huqûqnasan a Seba Azadîye (OHD) veng da Wezîrîya Edaletî ke wa binpaykeridşê heqan biqedîyê û vat ê do demê tewr kilmî de zîndanî zîyaret bikerî.

Merdimanê tepişteyan vizêr zî verê Zîndanê Tekîrdagî de dabi zanayene ke 12 tepişteyî 17ê çeleyî ra nata vera binpaykerdişê heqanê grevê vêşanîye de yê semedê wedaritişê tecrîdî veng dabi.