Komîsyonê Huqûqî yê ÎHDyî yê Antalya derheqê binpaykerdişanê heqanê tepişteyan ê Zîndanê Antalya de raporêk amade kerd. ÎHDyî raporê xo de ca da zîyaretê cinîya tepişte Erdogan Erduranî Sidika Erduran. Rapor de ame vatene ke nêweşê kanserî Erduran wextê şîyayîş û ameyîşê nêweşxaneyî de heman tepişteyan reyde ke rewşa înan binê rîskî de ya, koxûşê karantîna de yeno tepiştene.

Rapor de rewşa Erduranî ameye vîrvistene û wina ame vatene: ''Tewr peyên Erduran koxûşê karantîna de  28 kesan reyde ke rewşa înan birîsk a, maneno û pê vîrusê Korona keweno. Dima wedarîyeno nêweşxane. Heman koxûş de testê 5 tepişteyan ê bînan zî pozîtîf vejîyenê. Goreyê zanayîşanê ma 15 kesê bînî zî koxûş de pê Korona kewtî û yenê weşkerdene.''

Rapor de bale ameye antene ke tepişteyê nêweş û birîskî ganî heman koxûş de nêmanê û ganî na mesele cade çareser biba.

Dewamê rapor de wina ame vatene: ''Xebatkarêkê/a weşîye ya/yo ke nêwaşt nameyê xo bida/o eşkera kerd ke Nêweşxaneyê Perwerde û Cigêrayîşî yê Alanya de tepişteyê ke zîndanî ra yenê, kişta tepişteyan ê nêweşanê Korona de ca dîyeno înan. No kerdiş bi xo binpaykerdişê heqanê merdiman o. Seba pawitişê merdiman herinda ke tepişteyê nêweşî odaya yewkesî ya îzolasyonî de bimanê  pêro pîya heman koxûş de gêrîyenê binê karantîna.''