Zîndanê Boluyî de 33 tepişteyê ke 30 serrî yo tepişîyenê, hetê Heyetê Îdare û Çimdarîye yê Zîndanî ra bi bahaneyan vera nêdîyenê. Heyetî bi bahaneyanê sey ‘awe xerc kenê, kitabî nêwanenê, nêşinê cayê îmamî’ înfazê tepişteyan vêşna.

Avûkatanê Şubeyê Îstanbulî yê OHDyî ra Îshak Demîrelî derheqê babete de ajansê ma rê qisey kerd.

Demîrelî da zanayene ke Zîndanê Boluyî de tewr tay 130 tepişteyê sîyasîyî est ê ke zafê nînan rê cezaya muebede dîyaya. Demîrelî vat: ‘’Nînan ra 33 tepişteyan cezayê xo yê 30 serrî temam kerdî la veradîyayîşê înan yeno astengkerdene. Mehkeme cezayê înan ê înfazvêşnayîşî betal kerdibi. La Heyetê Îdare û Çimdarîye ancî tehlîyeyî asteng kerdî.

Heyetê Îdare û Çimdarîye wina bahane kerda ke tepişteyî ‘kitaban bi qîmî nêwanenê.’ La zîndan de cara kotaya kitabgirewtişî est a. Seba ‘xerckerdişê awe’ zî cara yew kota est a. Sîstemê Heyetê Îdare û Çimdarîye cara problematîk o. Bolu de vera tepişteyan bêhuqûqîye yena kerdene. Mehkemeyê Ceza zî îtîrazan red kenê û goreyê Heyetê Îdare û Çimdarîye bire danê.’’