Dîya zanayene ke Zîndanê Elbîstanî de kesanê ke xo sey 'kontragerîlayan' pênas kerdo eşto koxûşan ser, tepişteyan rê îşkence kerdo. Îşkenceyî ra dima se ra 90ê tepişteyî ameyî surgunkerdene.
Eşkera bi ke Zîndanê Elbîstanî de kesanê ke teberî ra ameyê û xo sey 'kontragerîlayan' pênas kerdo eşto koxûşan ser, tepişteyan rê îşkence kerdo.
Goreyê agahîyan sereştiş bi fermanê Wezîrîya Edaletî ameyo kerdene. Îşkenceyî ra dima zî tepişteyî verî huceyê yewkesî de tepişîyayî û dima zî se ra 90ê înan ameyî surgunkerdene.
30ê êlule de tepişteyêkî bi telefonî keyeyê xo de qisey kerd û da zanayene ke teberî ra tay kesê ke xo rê vanê 'kontragerîla' ameyê û înan eşt koxûşan ser. Tepişteyî îfade kerd ke nê kesan dima destê tepişteyan kelemçe kerdê û îşkence kerdo.
Şubeyê Amedî yê Komeleya Huqûqnasan a Seba Azadîye (OHD) 10ê teşrîna verêne de zîyaretê zîndanî kerd û derheqê babete de raporêk amade kerd. Rapor de ame vatene ke mabênê 21 û 23yê êlule de Wezîrîya Edaletî ra yewinêka taybete eşto koxûşan ser û cigêrayîş kerdo. OHDyî pê hesna ke tepişteyan gerreyê îşkence û kerdişanê xiraban kerdo rixmê ney zî derheqê serebûtî de tehqîqat nêameyo akerdene.
Ame parekerdene ke tepişteyî 11 rojî hucreyê yewkesî de tepişîyayê û 28ê êlule de se ra 90ê tepişteyan surgunê zîndananê Antalya, Konya û Erziromî ameyî kerdene.
