Zîndanê  Patnosî yê Tîpê L’yî yê Patnosî de şîdet û tedayê serê tepişteyan dewam kenê. Dadîya tepişteyê bi nameye Mustafa Toptekînî, Herdem Toptekîne pare kerd ke pêroyê heqê domanan ê ma yenê binpaykerdene û zindan kerd merkezê tecrîd û îşkenceyî.

Toptekîne ard ziwan ke lajê ey 9 serran ra nata zîndan de tepişte yo ke bi îdîaya “endamîya rêxistine” ameye tepiştene. Toptekîne vat, “Wexto ke ez şîya zindan lejê mi mi rê va ke dimayê greve vêşanîye, tewirê îdareyê zîndanî bîyo huşkêr. Lajê mi embazanê xo reyde 2 menge greve vêşanîye de mendo, zaf zeîf û bêhal bîyo.Lajê mi vat hem şîdeto fîzîksel hem zî şîdeto psîkolojîk ci rê kenê. Lajê mi nê 9 serran de bîyo nêweş. Tepişteyî wextê xo de nêbenê nêweşxane, înan weş nêkenê. Ez lajê x ora pere erşawena, la pere nêdanê lajê mi.Patnos bîyo cayê îşkenceyî û şîdetî. Dimayê grevê vêşanîye şîdet û tedayî bîyî zêde. Gardîyanî hewte de 2 rey erzenê serê koguşan û cêgêrayîş kenê. Gardîyanî rûmetê tepişteyan şiknenê û înan rê heqaret kenê. Lajê mi vat ke zîndan de ekîbê taybetî estî. Ganî Wezaretê Edeletî înan ser cigêrayîş bike. Hewte de reyêk awa germine danê tepişteyan û werde û şimiteyê înan de nenûgî vejîyenê. Rojname û kitabî nêdanê înan.”