Zîndanê Qefilnayeyî yê Tîpê E yê Riha de şewat vejîya. Îxbarî ra dima îtfaîyayî û ambulansî sewqê zîndanî ameyî kerdene. Keyeyî verê zîndanî de ameyî pêser û înan vat ke selahîyetdarî xebere nêdanê înan. Seba ke verê zîndanî de girseyêko pîl ame pêser polîs û TOMAyî zî sewqê zîndanî bîyî.

Polîsan mabênê berê zîndanî û girseyî de bendî nayî ro. Nêrazîbîyayîşê girseyî ra dima Walîyê Riha Abdullah Erînî qisey kerd û îdîa kerd  ke 4 tepişteyan asteng kerdo ke gardîyanan debikewê zereyî la dima nê tepişteyan ber akerdo. Walîyî vat ke zîndan de şewat nêvejîyayo û zerarêk nêresayo tepişteyan ser.

Girseyî îfade kerd ke înan eşkerayîya walîyî ra bawer nêkerd û waşt merdimanê xo bivînê. Naye ser o heyetê bi 3 kesan kewt zîndan. Heyetî ard ziwan ke zîndan de rewşêka xirabe çin a. Polîsan nêverda ke avûkat û îdarekarê Baroyê Riha zî debikewê zîndanî.  

Dîya zanayene ke tepişteyo ke cezaya dîsîplînî dîyaya ci odaya xo daye adirî ver. 4 tepişteyî wedarîyayî Nêweşxaneyê Cigêrayîşî yê Mehmet Akîf Înanî. Ame parekerdene ke tay tepişteyî zî zereyê zîndanî de payan ser ameyî tedawîkerdene. 

Heman zîndanî de 2012 de zî şewat vejîyabi û 13 tepişteyan şewat de dinyaya xo bedilnabî.