Zîndanê Sîlîvrî ra tepişte Abdurrahîm Baybarî pê telefonî keyeyê xo reyde qisey kerd û qala tedayanê serê tepişteyan kerde.

Baybarsî da zanayene ke 7ê teşrîna verêne de gardîyanan eşt koxûşan ser û koxûş û blokî vurnayî. Baybarsî pare kerd ke têkilîya tepişteyan a bi yewbînan bi nê hawayî birîyaye û înan rê ameyo vatene ke tay tepişteyî do sewqê blokê E binê û tepişteyê bînzî do sewqê Zîndanê Numraya 3. bibê.

Baybarsî îfade kerd ke o pa 13 embazanê xo koxûşêkê sey qafesî de ame cakerdene û nêzaneno ke tepişteyê bînî ameyî berdene kamca.

Abdulkadîr Baybarso ke birayê Abdurahîm Baybarsî yo û Zîndanê Kurkçulerî de maneno pê rayîrê telefonî keyeyê xo pê hesna ke o hucreyê yewkesî de maneno û 23 rojî yo grevê vêşanîye de yo. Abdulkadîr Baybars 2016 ra nata tepişte yo û 4 serrî yo hucreyê yewkesî de maneno. Baybars wazeno hucreyê yewkesî ra bêro vetene.