Goreyê agahîyanê ke ameyî girewtene 3ê teşrîna verêne ra heta ewroyî 100 tepişteyî bi zorî Zîndanê Kirikkale ra sewqê Zîndanê Tekîrdagî bîyî.

Zîndanê Tekîrdagî de tepişteyan rê cigêrayîşo rût ame ferzkerdene, tepişteyê ke vera ney vejîyayî maruzê şîdetî mendî.

Dîya zanayene ke 3ê teşrîna verêne de wexto ke Fatîh Kaplan, Fîkret Aslan, Mesût Eren û Bulent Ozcan, 4ê teşrîna verêne de Huseyîn Bektaş, Kenan Çîçek, Îsrafîl Aras û Mehmet Develî sewqê Zîndanê Tekîrdagî bîyêne înan rê cigêrayîşo rût ame ferzkerdene. Dima ke tepişteyî vera ney vejîyayî odaya bêkamera de gardîyanan nê tepişteyan rê îşkence kerd.

Huseyîn Bektaşî telefon de qala îşkenceyî keyeyê xo rê kerde û pare kerd ke di rojî ra dima tepişteyê maruzê îşkenceyî bîyî erşawîyayî revîrî. Bektaşî ard ziwan ke doktorê revîrî raporê derbe nêdayo ci, îdareyê zîndanî zî lihêf û betanîya nêdayê ey.