Zîndanê Tîpê Seyî yê yewkesîye yo ke verî Antalya de dest pêkerd, badê Mugla û Idirî nika zî Erzirom de  ame viraştene. Gama ke MHP 1999î de îqtîdar de bi badê qetilkerdişê bi seyan tepişteyan tîpê Fyî kewtbî dewre. Nika zî modelê tîpê Syî yenê viraştene.

Pê tîpê Syî yeno waştene ke tepişteyê ke cezaya muebedî dîyaya ci hucreyanê yewkesîye de bêrê tepiştene û bi temamî cuye ra bêrê îzolekerdene. Xora Zîndanê Erziromî de keyeyê nêeşkenê rehet şirê qicanê xo bivînê. Baldar o ke tîya tîpê Syî yê ke tîpê Fyî ra xirabêr ê ameyî viraştene.

Ma derheqê zîndanê tîpê Syî de Wekîla HDPyî ya Wanî Muazzeze Orhan, Hemsereka  Şubeyê Wanî yê TUHAY-DERî Edîbe Babur û Huqûqnas Feyzî Çelîkî de qisey kerd. Heminan vat pê viraştişê nê zîndanî yeno waştene ke tecrîdê Îmraliyî heme zîndanan de bêro vilakerdene.

Muazzeze Orhane tîpê Syî sey keyeyanê mergî hesibnayî û vat: ''Tirkîya de xeylêk wext o ke seba ke tepişteyê sîyasîyî zîndanî ra weş mevejîyê teber çi hewce keno yeno kerdene. Pê tîpê Syî tepişteyî bi temamî do bigêrîyê binê tecrîdî. Tepişteyan tik têna verdenê ke wa bimirî ya zî problemê psîkolojîk vejîyê.  Kenê ke tecrîdê Îmraliyî bi hewayêkê fermî vila bikerê. Zîndanan kenê keyeyanê mergî. Bi hezaran tepişteyê kurdê sîyasîyî do nê zîndanan de bêrê komkerdene.''

Edîbe Babur zî vat: ''Erzirom de di Zîndanê Tîpê Syî ameyî viraştene. Înan ra yew ame ekerdene û xeylêk tepişteyî herêma Karadenizî ra sewqê tîya bîyî. Heme embazê ke ameyî tîya cezaya înan a muebedê giranî esta. Yeno waştene ke wird zîndanê Erziromî bibê zîndanê herême. Tîpê Syî semedê kurdan do bibê kampê arêdayîşî. Tîpê Syî yeno manaya hucreya mergî. Nê zîndanî semedê kurdan ameyî viraştene. Seba ke keyeyî rehet nêeşkenê şirê Erzirom tîya vîjna. Ê se kenê wa bikerî kurdî dewaya xo canêverdenê coka ma veng danê Wezîrîya Edaletî ke wa na polîtîkaya xo caverdê.''

Fevzî Çelîkî zî vat: ''Bi tîpê Syî yeno waştene ke tecrîd bêro xorîkerdene. Tepişteyanê ke cezaya înan a muebedê giranî est a, kenê ke înan çend zîndanan de kom bikerê. Nê zîndanî cayê ke resasyîşê ci zehmet o de viraştî ke tepişteyî wa meeşkê merdim û avûkatanê xo zî rehet bivînê.''