Xebera rojnameyê Bîldî de ame parekerdene ke hukmatê Almanî kombîyayîşo berz ê wezîranê karanê teberî yê Yewîya Ewropa de ambargoyê çekan ê verba Tirkîya asteng kerd.

Xeberêka Spîegel Onlîne de zî ame vatene ke hukmatê koalîsyonî derheqê Tirkîya de munaqeşe keno û tawirê Wazîrê Karanê  Teberî Heîko Maas ê kombîyayîşê wezîranê karan ê teberî yê Yewîya Ewropa ame vîrvistene. Maasî kombîyayîş de tewiro klasîk ê Almanya mojna û bi israr var, 'Seba ke Tirkîya rê bêro tesîrkerdene ganî dîyalogî dewam bikê'.

Goreyê  îdîaya Bild Zeîtungîyî kombîyayîşo berz ê Luksemburgî de ambargoyê  çekan asta Yewîya Ewropa de kewtibi rojdem zî mabênê qerarname de neame parekerdene. Wezaretî waşt Yewîya Ewropa teqez ambargoyê çekan tasdîq nêkere û têna welatê endamî asta neteweyî de rotişê çekan û teknolojîyê leşkerî kontrol bikê. La eke asta Yewîya Ewropa de ambargoyê çekan estbîyayêne, na ameyêne na mena  ya ke pêroyê welatê Yewîye ganî çekan meroşê dewleta Tirkî. Nê mîyan de qerarê wedaritişî yê rotişê çekan ê asta neteweyî yê Almanya zî eşkera bîyo. Almanya rotişê çekanê ke heta nika peymanê înan amebî kerdene rê dewam bike, peymana ambargoyê çekan seba naye ra pey a. Coka çek û cebilxaneyê verênê ke hukmatî qerarê ci dabi, do Tirkîya rê bêrê pêşkêşkerdene.