Hemşaredara Sêrtî Sofya Alagaş wexto ke rojnamegerîye kerdêne derheqê ci de bi îdîaya 'endamîya rêxistine' dewa amebî akerdene. Vizêr Mehkemeya Cezaya Girane ya 5ine ya Amedî de cezaya 6 serran û 3 mengan dîyaye Hemşaredare Sofya Alagaş.

Wezîrîya Karanê Zereyî ya Tirkî bado ke ceza dîyaye Sofa Alagaş şaredarî de qeyûm ca kerd. Polîsanê ke banê şaredarî girewt binê ablûqa vat herinda hemşaredaran de qeyûm ameyo cakerdene.

Dima ra Wezîrîya Karanê Zereyî yê Tirkî eşkera kerd ke Hemşaredara Sêrtî Sofya Alagaş wezîfe ra ameye girewtene û herinda ci de Walîyê Sêrtî Kemal Kizilkaya sey qeyûmî ameyo cakerdene.

Bado ke Şaredarîya Sêrtî de qeyûm cakerdene şar verê şaredarî de ame pêser û vera qerarî nêrazîbîyayîş mojna.

Wekîla DEM Partî ya Sêrtî Sabahate Erdogan Saritaş  vera qeyûmî hêrsê xo ard ziwan û vat ê na darbeya vera îradeyê şarî qebul nêkenê û vera qerarî do xover bidê.

Hemserekê DEM Partî yê Sêrtî Eşref Tekinî zî vat: ''Îqtîdaro ke bi diznayîşê rayan zî nêeşkeno şaredarîye bigîro şaredarîya ma xest keno. No şar şi sindoq ser û hemşaredarê xo vîjnayî. Nê kerdişî vera sindoqî bêhurmetîye ya, derba ya.''

Polîsan waşt hemwelatîyan û partîyijan şarîdarî ra vejo la şarî vera nê nêrabîyayîş mojna. Polîsan hêriş kerd û hîrê kesî destbend kerdî. Badê hêrişî şarî verê şaredarî de dest pê çalakîya roniştişî kerd.

Vîjnayîşê 31ê adare ra nata Şaredarîyê DEM Partî yê Colemêrg, Mêrdîn, Êlih, Dersim, Xelfeti, Akdeniz, Bahçesaray û Sêrt ameyî xespkerdene.