Merkezê Îrtîbatî û Çapemenîye yê QSDyî bîlançoya 24 saetanê peyênan a çalakî û hêrişanê dewleta tirke ya îşxalkere û Artêşa Milî ya Sûrîye (SMO) eşkera kerde.

QSDyî vat: ''Roja çarşemeyî dewleta tirke ya îşxalkere bi teyarayanê şerî û droneyanê çekdaran Awbendê Tişrînî û Minbic dayî bombayan ver. Vizêr dewa Şêx Ubeydî zî ancî dîyaye bombayan ver. Nê hêrişan de zerarêk nêresa hêzanê ma ser.

Hêzanê ma Girê Qereqozaxî de xeylê çalakîyî kerdî la detayê nê çalakîyan nêameyî destvistebe.

Hetê bînî ra Yewinanê Hewayî yê Şehîd Harûmî Girê Qereqozaxî de vera çeteyan çalakîyêke kerde û netîceya çalakîye de baregehêkê îşxalkeran bi temamî ame îmhakerdene.

Dewleta tirke ya îşxalkere dewê Xeseq, Cada, Bîr Hîso, Qereqozaxî, Mehlê û Dîkanî yê Kobanê dayî bombayan ver. Netîceya nê hêrişan de zeraro madî qewimîya.

Dewleta îşxalkere Kobanê de keyeyêk da bombayan ver, hêriş de 2 kesî şehîd bîyî û cinîyêke zî birîndar bîye.

Cepheyê Dêr Hafirî de noqtayêka hêzanê ma dîyaye bombayan ver. Hêriş de zeraro madî qewimîya.''