Çalakî û aktîvîteyanê 8ê Adare Roja Cinîyan ê Kedkeran a Dinya dest pêkerd. Dêrsim, Wan, Riha, Colemêrg, Şirnex û Adana de cinîyê ke vejîyayî kueçyan, faşîzmê camerd-dewlete û tecrîdê Îmraliyî prostesto kerdî û mesajê pîlkerdişê têkoşînî dayî.

Platformê Cinîyan ê Dêrsimî banê Egîtîm-Senî de eşkerayîye daye. Hemsereka HDPyî ya Dêrsimî ya verêne Nurşate Yeşîl ard ziwan ke ê do 8ê Adare de meydanan de bê û vat: ''Ma do vera îqtîdarê ke verdayo heq û cuya ma, deskewteyanê ma xesp keno pê têkoşînî ser bikewê. Ma Pêkerdişê Îstanbulî canêverdenê, Gulîstane Doku xo vîr ra nêkenê. Wext wextê rijnayîşê dêsanê ters, zext, şîdet û merdî û yewbîyayîşî yo. Ma do 8ê Adare de Kuçeyê Sanatî bêrê têhet û heta Meydanê Seyîd Rizayî rayra şirê û mîtîng virazê. Ma veng dana heme cinîyan ke wa vera zextan vejîyê kuçeyan û vengê xo berz bikerê.''

Reyna Wan, Riha, Colemêrg, Şirnex, Adana û xeylêk bajaranê bînan de zî serkêşîya TJA û HDPyî de çalakîyî ameyî kerdene û vera polîtîkayanê hêrişkaran ê dewleta tirke yê vera kurdan û cinîyan mesajê pîlkerdişê têkoşînî ameyî dayene. Cinîyan vat ê vera îqtîdarê faşîstî serewedaranê û veng da ke wa tecrîdê serê Rayberê Şarê Kurdî Abdullah Oclanî bêro wedaritene ke meseleyê welatî bêrê çareserkerdene.