Merasîm û şayîyê 8ê Adare Roja Cinîyan ê Kedkaran a Dinya xeylêk şaristanan de yenê kerdene. Merasîm û şayîyan de mesajê pîlkerdişê têkoşînê cinîyan ê vera sîstemê pederşahîye ame dayene.

Qezaya Geverî ya Colemêrgî de şayîya 8ê Adare bi beşdarîya xeylêk cinîyan ameye kerdene. Şayîye de hunermendî Berfîne aktay û Ayfere Duzdaş vejîyayî sehne ser.

Wan de Meclîsê Cinîyan ê KESKî komxebatêke kerde. Komxebate de cinîyan broş û zîynetî viraştî. Vervatoxa Cinîyan a KESKî Funda Demîr Bozkurt pare kerd ke ganî cinîyî vera teda, qirkerdişî, tacîz û tecawuzan zêde têbigêrê.

Riha de Platformê Cinîyan panelê ''Çarçewa cînsîperestîya komelkîye de cinîyan'' kerd. Salona panelî de pankarta ''Cinîye, Cuye, Azadîye'' ameye dardekerdene û panel de seba têkoşînê hemparî yê cinîyan veng ame dayene.

Şirnex de rayberîya TJA û Meclîsê Cinîyan ê HDPyî de kombîyayîşê cinîyan ame serûberkerdene. Qezayanê şaristanî de zî cinîyî ameyî zîyaretkerdene. Wekîla HDPyî Nurane Îmîr aktîvîstanê TJA û Mayanê Haştîye reyde tewrê zîyaretan bîye. Îmîre zîyaretan de pare kerd ke têkoşînê cinîyan ê kurdan pêro dinya rê bîyo mîsal.

Amed de Platformê Cinîyan ê Amedî merkez û qezayanê Sûr, Rezan, Yenîşehîr û Kayapinarî de broşurî vila kerdî. Polîsanê tirkan semtê Ofîsî de waşt cinîyan asteng bikerê la cinîyan pê sloganê ''Cinîye, cuye, azadîye'' vera polîsan nêrazîbîyayîşê xo mojna.

Mêrdîn de Platformê Cinîyan ê Şahmaranî TJA reyde Mêrdînê Tarîxîyî de şayîyêke serûber kerde. Cinîyî pê kincanê xo yê tradîsyonelan tewrê şayîye bîyî. Şayîye de sloganê ''Cinîye, cuye, azadîye'' ame vatene û deyîrê bi kurdkî ameyî vatene. Nisêbîn de zî aktîvîstan ber bi berî vilawekî vila kerdî û venga her kesî da ke tewrê çalakîyanê 8ê Adare bibê.

Adana, Hatay û Konya de zî bi şayî û aktîvîteyan rayberîya HDPyî de 8ê Adare Roja Cinîyan a Dinya ameye fîrazkerdene.