Endama Meclîsê Şaredarîya Çewlîgî ya HDPyî Songule Barcadumuş Solmaza ke derheqê 8ê Adare Roja Cinîyan ê Kedkeran ê Dinya de Jinnewsî rê qisey kerd vat ê do semedê caardişê edaletî kuçeyan de bê.

Solmaze bale ante muhîmîya tarîxê 8ê Adare ser û vat: ''Ma na roje têna sey roja pîrozkerdişî nêgenê dest, 8ê Adare semedê ma roja çalakîye ya. Na roje netîceya têkoşînê cinîyan de ameye îlankerdene. Ma nê cinîyan rê deyndarê ke ma rê no têkoşîn sey mîrasî verdayo.''

Songule Barcadumuş Solmaz vat: ''Ma emser 8ê Adare Garîbe Gezera ke zîndan de bi hewayêkê şikdarî cuya xo bedilnaye û Denîze Poryraza ke banê HDPyî yê Îzmîrî de ameye qetilkerdene rê dîyarî kenê. Senî ke cinîyî heme dinya de na roje pîroz kenê ma zî do Çewlîg de vejîyê kuçeyan.''

Solmaze bale ante têkoşînê Emîne Şenyaşar û dayîkanê bînan ê ke cigêrayîşê edaletî de yê ser û  qirkerdişê vera cinîyan ê ke tim zêdîyenî vistî vîrî û vat ê do vera heme zext û neheqîyan vejîyê kuçeyan û têkoşînê xo xurtêr bikerê.

Songule Barcadumuş Solmaz ard ziwan ke ê do derheqê mana û mûhîmîya 8 Adare de panel bikerê û seba ke bale biance rewşa cinîyan ser do rayraşîyayîşêk bikerê û vat: ''Ma do cinîyan reyde bêrê têhet û vera zîhnîyetê qirkerdişî qala pîya têkoşînî bikerê. Êyê ke ma cinîyan nêvînayîşî ra yenê vera înan têkoşînê ma do tim dewam bikero.''