Îdir de cinîya bi nameyê Dîlane K. seba ke waştêne tira cîya biba hetê mêrdeyê xo Maruf K. ra ameye qetilkerdene. Reyna  bajarê Serdeştî yê Rojhelatê Kurdîstanî û Îstanbul de zî 2 cinîyî ameyî qetilkerdene.

Taxa Karaagaçî ya Îdire de dadîya 2 domanan Dîlan K. seba ke waştêne tira cîya biba hetê mêrdeyê xo Maruf K.yî ra ameye qetilkerdene. Maruf K.yî bi hawayêkê sîstematîkî Dîlane rê şîdet kerdêne. Dîlane dewaya verdayîşî ra dima keyeyê dadîya xo de ca bibî. Maruf K. şewe saete 02:00 de panceraya keyeyê dadîya Dîlane şikite û pê çeke Dîlane kişte. Kiştox serebûtî ra dima rema.Cenazaya Dîlane wedarîyaye morgê Nêweşxaneyê Dewlete yê Idîrî.

Bajarê Serdeştî yê Rojhelatê Kurdîstanî de cinîya bi anmeyê Sonya Degkan hetê çar tenan ra ameye remnayene û pê îşkencekerdişî ameyî qetilkerdene. Goreyê xebera Ajansê Kurdpa Sonya Dagkan hewteyêk verê cu hetê çar merdimanê xo ra cayê karî ra ameyî remnayene û teberê bajarî de pê îşkencekerdişî ameye qetilkerdene. Çarçewa cipêrsayîşî de bira û dezayê cinîya ciwane 24ê çeleyî de ameyî destbendkerdene. Wirdan zî îtaraf kerd ke înan Sonya kişta û erazîya venge de defin kerda.  Cenazaya Sonya cayo ke ameybî definkerdene ra vejîyaye otopsîya ci ameye kerdene. Netîceya otopsî de ame tespîtkerdene de ke pê îşkencekerdişî ameya qetilerdene. Di qetilkare binê yenê gêranayene.

Qezaya Eyupsultanî yê Îstanbulî de  zî camêrdo bi nameyê U.B.yî dadîya xo Şukran B. û biraleteyê xo Mesut B. qetil kerdî. U.B.yî ke sûcê xo îtîraf kerd ame tepiştene.