Serekê Şaredarîya Bajarê Pîlî yê Îstanbulî û Serekê Yewîyanê Şaredarîyan a Tirkîya Ekrem Îmamoglu şi Mêrdîn û  Hemşaredarê Bajarê Pîlî yê Mêrdînî Ahmet Turk û Devrîme Demîr ê ke 4ê teşrîna peyêne de wezîfeyê înan ameyî xespkerdene, zîyaret kerdî.

Hetkarê serekê pêroyî yê CHPyî Gokçe Gokçen û Gul Çiftçî, Wekîl Mahmut Tanal, Şaredarê Bajarê Pîlî yê Adana Zeydan Karalar, Şaredarê Bajarê Pîlî yê Mersinî Vahap Seçer û Şaredarê Semsurî Abdurrahman Tutdere zî heyetê Îmamogluyî de ca girewt.

Pîya bi Ahmet Turk û Devrime Demir Hemşaredarê Bajarê Pîlî yê Amedî Sera Bucak û Dogan Hatun semedê pêşwazîkerdişê Îmamogluyî şiyî warê teyarayan. Îmamogluyî dima a Dêrik de keyeyê Ahmet Turkî zî zîyaret kerd.

Badê werdî eşkerayîye ameye dayene. Ahmet Turkî vat pê sîyasetê qeyûmî demokrasî nêbena.

Îmamogluyî zî vat: ''Eybo ke nê wextî de ma hema qala xespkerdişê heqê vîjnayîşî kenê. Seba ke hinî wa bêhuqûqîye mebo, ma Mêrdîn de yê. Ma tîya qala ameyoxê welatî û haştîye kerd. Ma wazenê wa nê welatî de yewîye, haştîye û hûzûr bibo. Coka gamê zixmê ke ma do tîya ra bierzê muhîm ê.''