Îdarekara Komeleya Rosa û Avûkate Berfîne Polat bi wesîleya 8ê Adare Roja Cinîyan a Dinya ANFyî rê qisey kerd.

Avûkate Berfîne Polat îfade kerd ke îqtîdar pê hêrişanê vera cinîyan û beşanê bînan ê komelî wazeno ke otorîteyê xo mende bikero û bale ante planê çalakîye yê Dîyanetî ser.

Polate vat: '' Dîyanet vano prosesê verdayîşî de û seba cinîyanê ke keyeyanê pawitişî de manenê ê do rayberîya dînîye bikerê. Dîyanet bi nê hawayî bikero ke cinîyan îqna bikero. Nê planê çalakîye de vera şîdetê serê cinîyan çîyêk çin o. Ê wazenê verê verdayîşê cinîye-camêrdî bigêrê û na hişmendîye komelî rê vila bikerê.''

Polate da zanayene ke dezgehê muhakemekerdişî yê dewlete derheqê bara cinîyan de wayîrê tewirêkê cîyakerî yê û vat: ''Dewayanê verdayîşî de ma vînenê ke muhakeme cinîyan esas nêgêno. Heqê nafaka 370 lîra yo. Cinîyî dima ke zewijîyenê seba ke perwerde û xebitîyayîşî ra dûrî kewenê verê xo danê keda zereyê keyeyî. Zereyê keyeyî de keda cinîyan nêdîyena la wextê verdayîşî de nafaka 370 lîra ya. Ma vera nê sîstemî yê.''

Polate vist vîrî ke tedaya vera cinîyan û dezgehanê cinîyan zaf ê û vat: ''Prosesêk esto ke no proses Peymana Îstanbulî reyde geş bîyo. Zîndanan de zî sey Aysele Tugluk cinîyan rê hêrişî dewam kenê. Raporê Dezgehê Tipê Edlîyî yê vera Aysele Tugluk vanê 'A eşkena zîndan de bimana.' Cinîyî bi paştdayîşê xo vera ney vejîyenê.''