Endama Koordînasyonê PAJK’î Şîmal Ulkem Guneşe şexsê Zîlane (Zeynep Kinaci) ke 30’ê Hezîran a 1996 de û Sema Yuceya ke 17’ê Hezîran a 1998’î de û Gulana ke Hezîrane de şehîd bîbî, heme şehîdê mucadeleyê azadîye bi vîr ardî û vat, bi her her şert û halî ê do mucadeleyê înan rê wayîr vejîyê.

‘Rayberîya Ma Rayberîya Azadîye ya’

Guneşe vat, Rayberê Şarê Kurdî Abdullah Ocalan her pêvînayîşî de rojdemêkê taybetî yê cinîyan ano meydan û vat, “Ganî merdim nê nizdbîyayîşo ke heman wextî de ramojneno ke o senî bi hawayêkê stratejîkî nizdê problemê cinîyan beno û ganî no problem rastîya Rayberîye ra visnaye nêro şîrowekerdene. Ma Rayberîya xo sey rayberê azadîye pênase kenê. Senî ke her fikir, îdeolojî û zanistê cimatkî wayîrê rayber û serkêşêk o, Rayber Apo zî rayberê azadîye yo. Sebebêkê nê yê tewr muhîmî ra yew zî nizdbîyayîşê ê yê problemê cinîyan o. Rayberîya ma her wext bi taybetî problem cinîyan ser o vinderto, bi hîrayî ser o xorîn bîyo, nê problemê giranî hetê tarîxî û cimatkîyî ra ercnayo.”

'Problemê Cinîyêk yê Heme Cinîyan o'

Guneşe dewamê qiseykerdişê xo de vana, “Rayberîya ma ramoto ke cinîyî ganî hemcinsanê xo reyde mucadele bikerê. Seke yeno zanayene, cinî heta hucreyanê xo ameyê perçekerdene, verê perçeyanê xo de zî înan a vista wina halêk ke xo rê xerîb menda. Verê hemcinsanê xo de xerîb ameya verdayene. Naye ra cinî, kewta halêkê winayênî ke bibo madeyêk û metayêka camêrdî.”

“Rayberîye Her Tim Muhîmî Daya Yewîya Şaranê Mezopotamya”

Serê tespîtê “Bê Kurdî Tirkî, bê Tirkî zî Kurdî nêbenê”, “Kurdê qedîyayeyî Tirkê qedîyaye yê” yê Rayberê Şarê Kurdî Abdullah Ocalanî, Guneşe vat, “Nê fikirê Rayberîya ma newe nêyê. Her tim muhîmî daya yewîya şaranê Mezopotamya û hemverê kolonyalîzmî de vejîyayo. Têgêrayîşê ma de û bingeyê felsefeya ma ya azadîye de no esto. Rayberîya ma vana, ‘Gama Kurdîtî bêro qedênayene a game Anatolya de bi nameyê Tirkîtîye do çîyêk nêmano. Estbîyayîş û pîlbîyayîşê Kurdan yeno manaya bihêzbîyayîşê Tirkan. No nîşanêkê tarîxî yo, îcadê ma nêyo.’ Keno ke vajo, eke wina mebo do binkewtiş bibo, sîyasetê yan ez yan ti faşîzm o.”

''Cinîyî Hendî Rayanê Xo Nêdanê AKP‘yî'

Endama Koordînasyonê PAJK'î Şîmal Ulkem Guneşe dewamê qiseykerdişê xo de vat, „Tirkîya de dînamîkê demokrasîyî şar ê, cinî yê. Ne AKP û ne zî Erdogan o. Tirkîya de system bîyo leymin. Cinîyî, ciwanî û şar vurayîşî wazenê. No zelal o. Sebebê newekerdişê weçînitişê Stenbolî no yo ke no rejîmo faşîst binkewtişê xo qebûl nêkeno. Erdogan Bînalîyî erzeno raste û vano oyo ke vînî bikero ez yan zî sîstemê mi nêyo, Bînalî yo. La na saete ra tepîya ê se kerê zî cinîyî rayanê xo nêdanê AKP’yî.“

Guneşe hêrişê îşxalkarî yê serê Xakurkê zî bi vîr vist û vat, „Yê ke yenê qetilkerdene û kenê ke qirê înan bîyarê Kurd ê, cinî yê. No têgêrayîşo îşxalkar tecawizkar o. Cinîyê Kurdistanijî ganî hemverê nê de mucadele bikerê. Ganî cinîyê Kurdistanijî û Tirkîyayijî dest bidê yewbînan. Weçînitişê Stenbolî de bi binfînayîşê AKP’yî ma pîya eşkenê mucadeleyê neweyî yê şorişgêrî bidê destpêkerdene.“

‚Cinîyî Rojêk Nêxebetîyê do Sîstem Bixetemîyo‘

Guneşe peynî de nê vatî, „Eke cinîyî tena rojêk vinderê, xebate nêkerê do sîstem birijîyo. Ma hesab bikerê ke heme cinîyê ke dinya de yê kewtê grev. No do hêzêkê zaf pîlî vejo werte. Eke cinîyî hemverê faşîzmî de Tirkîya yan zî cayêkê bînî yê Rojakewtena mîyanêne de mucadeleyê hemparî bidê do netîce bigêrê.“