Endamê Meclîsê Partîye yê DBPyî Mustafa Akengînî ANFyî rê derheqê Vengdayîşê Haştîye û Komelê Demokratîkî yê Rayber Apoyî de qisey kerd.

Akengînî da zanayene ke Rayber Apoyî newe vengdayîşêko winayên nêkerdo, o 30 serrî yo seba haştîye xîret keno. Akengînî vat: ‘’Kurdî bi cidîyetî wayîrê nê prosesî vejîyenê. Teda û înkarê vera kurdkî û kurdan dewam kenê. Raşta zî vengdayîşê Birêz Ocalanî wayîrê girîngîyêka tarîxî yo. Ganî merdim qîmet, mana û girîngîya ney bizano. Nê warî de kurdî prosesî tesdîq kenê û zerrî ra wayîrê ci vejîyenê.

Ganî merdim ney vajo; dewleta tirke hetê ekonomîk, huqûq û exlaqî ra rijîyayo. Qesawetê ma est o ke gelo hukmat do mesele çareser bikero yan ney. Hema hukmatî ra gamêke çin a. Nê prosesî ra hêvîya mi est a. Hukmat ganî gaman bierzo. Kurdî hinî bi kayan nêxapîyenê.’’

Akengînî dîyar kerd ke ganî tecrîdê vera Rayber Apoyî cade biqedo û o azad bibo. Akengînî vat: ‘’1ê teşrîna verêne de Devlet Bahçelîyî vengdayîşêk kerd û vat ke wa Birêz Ocalan bêro Meclîs de qisey bikero. Seba ney ganî çi hewce yo bêro kerdene. Wa ê bimojnê ma ke na babete de çendek cidî yê.

Birêz Ocalanî vîzyonêk pêşkêşê Tirkîya kerd. Eke şima tecrîdî wedarnê û şertan biafernê çîyo ke keweno milî do bikerê. Ganî cade tecrîd wedarîyo. Sey şar û partîye ma ney wazenê. Seba haştîyêka rûmetêne ma israr kenê.’’