Têgêrayîşê Cinîyan ê Azadan (TJA) û Meclîsê Cinîyan ê Partîya Demokratîke ya Şaran (HDP) çarçewa  8ê Adare Roja Cinîyan ê Kedkeran a Dinya de xeylêk bajaran de aktîvîteyî organîze kerdî.

 Amed

Qezaya Sûrî ya  Amedî de cinîyan serê Pirdê Desçimînî  ke serê Rojê Dicleyî de yo aktîvîteya firnayîşê balonan kerd. Çalakîya ke Wekîlê HDPyî Semra Guzele û Remzîye Tosun zî tewrê ci bîyî pird hetê polîsan ra gerîya binê ablûqa. Hemsereka HDPyî ya Sûrî Makbule Guner vat: ''Ma nê balonan vera şîdetê serê cinîyan firnenê, ma hêvî kenê ke şîdet zî wina fir bido şiro.'' Cinîyan dima pê tîlîlîyan balonê sipî û morî firnayî.

Riha

Riha de zî  cinîyê ke banê HDPyî de ameyî têhet cinîyan ê tepişteyan rê kartî şawîtî.

Mêrdîn

Mêrdîn de zî cinîyî bajarekê Xursî yê qezaya Qoserî de ameyî têhet.Vervatoxa HDPyî Ebru Gunsy zî tede cinîyî destê înan de vilîkî û pê sloganan heta Hênîyê Xursî şîyî. Cinîyan semedê cinîyan ê tepişteyan vilîkî eştî awe û deyîrî vatî. Cinîyan dima ra esnafî zîyaret kerdî û vilîkî vila kerdî.

Agirî

Meclîsê Cinîyan ê HDPyî yê Agirî Patnos de şayîye organîze kerde. Aktîvîteya ke Merkezê Kulturî yê Şarederîye de ameye kerdene Hemşaredare Muşerrefe Geçer û xeyêk cinîyî tewrê ci bîyî. Cinîyan verê programî bi deyîranê kurdkî goveng girewt. Dima ra qiseykerdişî ameyî kerdene û derheqê xoverdayîşê cinîyan de sînovîzyon ame ramojnayene.

Îstanbul

Meclîsê Cinîyan ê Kongreya Demokratîke ya Şaran (HDK)  banê xo yê merkezî de eşkerayîye daye. Vervatoxa HDKyî Îdîle Ugurluya ke eşkerayîye de qisey kerd ard ziwan ke îqtîdar seba ke cinîyan ra teseno hêriş keno û  semedê tewrbîyayîşê Rayraşîyayîşê Femînîstî yê Şewe yo ke do 6ê adare de Kadikoy de 8ê adare de Taksîm de bêro kerdene veng da. Reyna Platformê Cinîyan ê 8ê Adare zî bi eşkeryîyêke semedê tewrbîyayîşê çalakîya 6ê adare ke do Kadikoy de bêro kerdene veng da.

 Adana

Adana de zî aktîvîstanê TJA Ceyhan de şayî organîze kerde. Wekîla HDPyî Tulaye Hatimogullari û xeylêk cinîyî tewrê ci bîyî. Hatimogullariya ke tîya qisey kerd bale ante muhîmîya 8ê Adere ser û vat ê do xoverdayîşî pîlêr bikerê. Hatimogullari vist vîrî ke grevê vêşanîye yê tepişteyan hîrê mengî xo dima verdayî û waşt ke tecrîdê serê Rayberê Şarê Kurdî Abdullah Ocalanî bêro wedatiene. Şayî pê deyîranê Koma Ş.Azadî dewam kerde.