Çalakîyê 8ê Adare Roja Cinîyan ê Kedkaran a Dinya dewam kenê. Vakurê Kurdîstanî de rayberîya 'Têgêrayîşê Cinîyan ê Azadan (TJA) de çalakîyî yenê kerdene. Cinîyanê Amedî derheqê hewteyê 8ê Adare de ANFyî rê qisey kerd.

Fatma Levent tedaya vera cinîyan, kiştişê cinîyan şermezar kerdî û vat: ''Ez hêvîdar a ke rojê weşêrî hê verê ma de yê. Cinîyê ke raştê teda yenê ganî xo bipawê. Ganî cinîyî vera camêrdan sereyê xo wedarnê. Ma sey cinîyan mexdûrê şîdetî yê. Cinîyî ganî hertim mîtîngan bikerê, waran de bibê. No do verê ma abikero.''

Fatma Ergîn vat: ''Domanan rê tacîz û tecawuzî yenê kerdene. Heqê cinîyan nênê dayene. Cinîyî pê na rewşe qayîl nîyê. Rixmê hende hêrişan zî cinîyî payan ser de yê. Bêcezaverdayîşî, tacîz û tecawuzî ma qerqilnenê. 8ê Adare de wa pêro cinîyî waran de bibê.''

Gulluye Algan vat: ''Cinîyî neçare yê ke heqanê xo bigêrê. Ganî ma dekewê waran. 8ê Adare de ma pêro cinîyî bibê yew û na roje fîraz bikerê.''

Hêlîne Yildiz vat: ''Her roje cinîyî mirenê û peynîya ney nêna. Ma welatêkê asayîyî de nîyê. Ganî cinîyî têna rojêke ney her roje çalakîyan bikerê. Cinîyî eke pê xo bawer bikerê, eşkenê ser bikewê.''